İlqar Hüseynli: "Bu, kommunal xidmətlərdən daha səmərəli istifadə etmələrinə gətirib çıxaracaq"
Hökumət tərəfindən Qaçqın və Məcburi Köçkünlərin İşləri üzrə Dövlət Komitəsinə ayrılan vəsaitlər hesabına məcburi köçkünlərin kommunal xidmətləri xüsusi limit tətbiq edilməklə ödənilir. Eyni zamanda, məcburi köçkünlərə 18 manat aylıq yemək xərci verilir.
Bundan başqa, bölgələrdə məskunlaşan məcburi köçkün ailələri yanacaqla təmin olunur. Bununla yanaşı, məcburi köçkünlərin istifadə etdikləri kommunal xərclər müəyyənləşdirilmiş normativlər üzrə mərkəzləşmiş qaydada, birbaşa xəzinədarlıq vasitəsilə xidmət təşkilatlarına, müavinətlər isə plastik kartlarla ödənilir. Nəticə etibarilə artıq 10 ildir vəsaitlərin ödənişində canlı təmas amili tam aradan qaldırılıb. Bu sahədə işlərin təkmilləşdirilməsi həm müvafiq icra hakimiyyətləri, həm də xidmət təşkilatları ilə birlikdə həyata keçirilir.
Bu arada yayılan məlumatlara görə, məcburi köçkünlər üçün tətbiq edilən elektrik, qaz və su güzəşt limiti dəyişdiriləcək. Yəni həmin limitlərin pul ekvivalenti şəklində köçkünlərə ödəniləcəyi bildirilir. Yəni məcburi köçkünlərə kommunal xərclər üzrə dövlətin ayırdığı vəsaitlər ləğv edilir. Bunun əvəzində kommunal xərclərə görə ayrılan vəsait ünvanlı şəkildə məcburi köçkünlərin özlərinə veriləcək. Bunun üçün hər bir məcburi köçkün ailəsinə adambaşına əlavə 10 manat ödəniləcək. Bununla bağlı müzakirələrin getdiyi bildirilir. Belə fikirlər səslənir ki, limitin pul formasında verilməsi güzəştlərdən daha səmərəli şəkildə istifadə edilməsinə gətirib çıxaracaq. Eyni zamanda, bu sahədə bəzi israfçılıq hallarının qarşısını alacaq. Maraqlıdır, ekspertlər buna necə yanaşır? Sözügedən məsələ ilə bağlı fikirlərini "Bakı-Xəbər"lə bölüşən ekspert İlqar Hüseynlinin sözlərinə görə, güzəşt limitlərinin pul şəklində verilməsi daha məqsədəuyğundur: "Qaçqın və məcburi köçkünlərin həyat səviyyəsinin yaxşılaşdırılması ilə bağlı vaxtaşırı müəyyən tədbirlər həyata keçirilir. O cümlədən, kommunal xərclərdə limitlər nəzərdə tutulub. Məcburi köçkünlərə müəyyən güzəştlərin edilməsi ilə bağlı uzun illərdir oturuşmuş sistem var. Güzəştlərin formasının dəyişdirilməsi ilə bağlı hələlik dəqiq mexanizm yoxdur. Hesab edirəm ki, bütün bunlar nəzərə alınaraq mükəmməl mexanizm hazırlanmalıdır. Bütün bunlarla yanaşı, məcburi köçkünlərə edilən güzəştlər nağd pul şəklində verilsə, bu, israfçılıq hallarının qarşısını alacaq. Bu, kommunal xidmətlərdən daha səmərəli istifadə etmələrinə gətirib çıxaracaq. Elektrik enerjisinin, qazın, suyun qədərindən artıq israf olunmasının qarşısını alacaq. Bu da, bütövlükdə, ölkədə elektrik enerjisindən, qazdan, sudan qənaətlə istifadə olunmasına gətirib çıxaracaq".
Vidadi ORDAHALLI
