Rəşad Həsənov: "Son dövrlər hərraclar keçirilməsi ilə bağlı şəffaf mexanizmin hazırlanması bu sahəyə öz təsirini göstərir"
Əmlak Məsələləri Dövlət Komitəsi tərəfindən keçən ilin avqustunda istifadəyə verilən özəlləşdirmə portalından (privatization.az) istifadə edənlərin sayı artıq 390 mini ötüb. Bu o deməkdir ki, insanların hərraclara marağı artıb.
Son 1 ay ərzində isə bu rəqəm 70 minə yaxın olub ki, bu da digər aylarla müqayisədə yüksək göstərici olaraq qeydə alınıb.
Statistikaya əsasən, məlum olur ki, istifadəçilər tərəfindən ən çox oxunan və ziyarətçi sayı yüksək olan bölmə məhz hərraclar bölməsidir. Azərbaycan istifadəçiləri ilə yanaşı, Türkiyə, Rusiya, ABŞ, Fransadan da portalı izləyənlərin sayı kifayət qədərdir. Bu da onu göstərir ki, özəlləşdirmə prosesi xarici investorlar üçün də maraqlıdır. Açıq hərraclar vasitəsilə özəlləşdirməyə çıxarılan hər bir səhmdar cəmiyyəti, kiçik dövlət müəssisəsi və nəqliyyat vasitəsi barədə məlumatlar, eləcə də hərrac elanları məhz bu portalda əks olunur.
Hərraclara marağın artması barədə fikir bildirən iqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, bu proses təbiidir. Əmlak Məsələləri Dövlət Komitəsinin təşkil etdiyi hərraclara ictimai inam artırsa, bu zaman hərrac üçün müraciət edənlərin də sayı çoxalır. Son dövrlər hərraclar keçirilməsi ilə bağlı şəffaf mexanizmin hazırlanması bu sahəyə öz təsirini göstərir: "Elektron müraciətlərin qəbul olunması kimi məsələlər insanların hərraclara inamını artırır. Bu baxımdan vətəndaşlar hərraclarda iştirak etməyə maraqlıdır. Eyni zamanda, bir məsələyə diqqət etmək lazımdır ki, 2016-cı ilin ikinci yarısında ölkədə dövlət səviyyəli müəyyən müəssisələrin özəlləşdirilməsinə start verildi. Bununla bağlı "Strateji Yol Xəritəsi" hazırlanıb və bəzi müəssisələrin özəlləşdirilməyə çıxarılması siyahısı tərtib olunaraq onlar hərraca çıxarılıb.
Beləliklə, bu sahədə dinamika müşahidə olunmağa başladı. Nisbətən azəhəmiyyətli müəssisələrin hərraclarda təklif olunması və ya əvvəlki dövrlərdə hansısa qrupların marağını çəkməyən obyektlərin özəlləşdirilməyə çıxarılması bu prosesdə oliqarx kapitalını məhdudlaşdırdı. Son nəticədə isə biznesin digər subyektləri və vətəndaşların prosesdə iştirakçı imkanlarının artması bu sahəyə marağı artırıb".
Günel CƏLİLOVA
