Vahid Əhmədov: "Aztəminatlı ailələr ayda təxminən 100 manat ödəməklə mənzilə sahib ola bilər"
Sosial evlərlə bağlı ikinci layihə reallaşdırılacaq. Bu barədə Mənzil İnşaatı Dövlət Agentliyinin (MİDA) aparat rəhbəri Anar Quliyev deyib.
Onun sözlərinə görə, artıq ikinci layihənin gerçəkləşdirilməsi üçün Suraxanı rayonu ərazisində, Hövsan qəsəbəsinə yaxın bir yerdə 20 hektar torpaq sahəsi seçilib: "Statistik təhlillər göstərir ki, Bakıda evlərə daha çox tələbat var. Ancaq layihənin tədricən respublikanın bütün ərazilərini əhatə etməsi nəzərdə tutulur. Artıq bir sıra şəhər, rayon mərkəzlərində torpaq sahələrinin seçilməsi ilə bağlı işlər aparılır".
A.Quliyev açıqlamasında onu da əlavə edib ki, sosial ev alacaq vətəndaşlara bir neçə üsulla ödəniş imkanı yaradılacaq: "Belə ki, vətəndaş öz hesabı ilə nağd şəkildə birdəfəlik ödəniş edərək mənzil əldə edə biləcək. Bununla yanaşı, vətəndaşa İpoteka Fondunun vəsaiti hesabına 30 illik kredit götürərək ödəniş etmək imkanı yaradılacaq. Həmçinin vətəndaş istədiyi başqa bir mənbədən, bankdan kredit götürərək ödəniş edə biləcək. Onu da əlavə edim ki, tikilən bütün mənzillərdə təbii küləklənmə sistemi quraşdırılır".
Məlumat üçün qeyd edək ki, Yasamal rayonundakı kompleksdə 2000 mənzil, Hövsanda isə 3000 mənzilin tikiləcəyi gözlənir. 35 yaşına qədər gənc ailələr agentliyə müraciət edərək sosial evlərdən yararlana bilər.
Ümumilikdə, ekspertlərin sosial evlərlə bağlı aparılan işlərə münasibəti necədir?
Sözügedən məsələni dəyərləndirən millət vəkili, iqtisadçı Vahid Əhmədovun fikrincə, sosial mənzillərlə bağlı Prezidentin xüsusi sərəncamı var və bu, "Yol Xəritəsi"ndə də öz əksini tapıb: "Amma bu sənəddə ödəniş sisteminin həlli ilə əlaqədar konkret qərarlar verilməyib. Yəni sadəcə müəyyən təkliflər irəli sürülüb. Sosial evlərin tikilməsi əsasən az və orta təminatlı ailələrin evlə təmin olunması ilə əlaqədardır. Belə ki, mənzil növbəsində insanlar çox olduğundan, belə qərar verildi ki, sosial evlər tikilsin. Bu təcrübədən Türkiyə, Almaniya kimi ölkələrdə də istifadə olunub. Bildiyimiz kimi, Yasamalda artıq 2000 mənzilin tikintisinə başlanıb və orada böyük bir şəhərcik salınır. Həmin mənzillərin ödəniş qaydaları isə may ayından sonra müəyyən olunacaq. Qeyd edim ki, bu barədə indidən müəyyən təkliflər var. Məsələn, təklif olunub ki, ayda 100 manat ödəməklə mənzilin dəyəri uzun müddətə ödənilsin. Bu barədə bir neçə variant irəli sürülüb. Amma hələlik bunlar tam olaraq açıqlanmayıb. Aztəminatlı ailələr ayda təxminən 100 manat ödəməklə mənzilə sahib ola bilər. Vətəndaşlar sosial mənzillərin tikilməsində maraqlıdır. Hesab edirəm ki, bu çox sərfəli təklifdir və dünya praktikasında da qəbul olunmuş sistemdir".
Vidadi ORDAHALLI
