Rəsul Cahangirli: "Bunun nəticəsində ölkənin ümumi iqtisadi inkişafında böyük işlər görülüb"
"2017-ci il yanvar ayının 1-dək dünya bazarlarında Azərbaycanın payına düşən 231,8 milyon ton "mənfəət nefti" satılıb. Mənfəət neftinin həcmi ilbəil artır. 2016-ci ildə dünya bazarlarında satılan 32,7 milyon ton neftin 19,3 milyon tonu, yəni 59 faizi Azərbaycanın payına düşən mənfəət nefti olub".
Bunu SOCAR-ın I vitse-prezidenti Xoşbəxt Yusifzadə mətbuata açıqlamasında bildirib. Onun sözlərinə görə, 2017-ci il yanvar ayının 1-dək dünya bazarlarına 435,4 milyon ton Azərbaycan nefti çıxarılıb ki, bunun da 321,7 milyon tonu Bakı-Tiflis-Ceyhan kəməri ilə nəql edilib.
Bununla yanaşı, X.Yusifzadə bildirib ki, müasir dövrdə ölkənin inkişafına bəslənən bütün ümidləri yalnız neftə, qaza bağlamaq düzgün olmaz: "Buna görə respublika rəhbərliyinin çalışdığı odur ki, sənayenin qeyri-neft sektoru da, kənd təsərrüfatı, turizm, xidmət sahələri də daha yüksək sürətlə inkişaf etsin, bunların hamısı bir-birini tamamlasın və nəticə etibarilə gələcəyimiz yalnız bir sahədən asılı olmasın. Əgər prezident deyirsə ki, biz bütün hədəflərə çatacağıq, deməli, belə də olacaq və mənim buna zərrəcə şübhəm yoxdur. Çünki İlham Əliyevin zəkasına, iradəsinə və qətiyyətinə hələ ötən əsrin 90-cı illərinin əvvəllərindən bələdəm. Neftin qiymətləri məsələsinə gəlincə, deyə bilərəm ki, bu qiymətlər dalğavari olaraq, zaman-zaman qalxıb da, düşüb də. "Əsrin müqaviləsi" imzalananda neftin bir barreli 13 dollar idi. Sonra qiymət 100 dolları keçdi. Bu bir eyforiya yaratdı. Sonra yenə enmə - 1 barrel üçün 40-50 dollar. Hesab edirəm ki, belə enmələr bizə problem yarada bilməz".
Bütün bu deyilənlərin fonunda, 231 milyon ton "mənfəət nefti" Azərbaycan iqtisadiyyatı üçün nə deməkdir? Məsələyə münasibət bildirən ekspert Rəsul Cahangirli buna bir neçə aspektdən yanaşdı: "O dövrdə Qərbin böyük neft şirkətlərinin Azərbaycanın enerji sektoruna sərmayə qoyması böyük hadisə idi. Bunun nəticəsində əhəmiyyətli şəkildə zəifləmiş ölkə iqtisadiyyatı dirçəlməyə başladı. Qoyulan sərmayələr, görülən işlər nəticəsində 2004-cü ildən başlayaraq Azərbaycana böyük neft pullarının axını başladı. Bunun nəticəsində ölkənin ümumi iqtisadi inkişafında böyük işlər görülüb. Neftin bir müddət baha olması imkan verdi ki, xarici neft şirkətləri qoyduqları sərmayəni daha tez götürsünlər. Bunun nəticəsində Azərbaycanın əldə etdiyi gəlirlər artdı. Neft kəskin bahalaşmasaydı, xarici şirkətlərin qoyduqları sərmayənin götürülməsi daha çox vaxt aparacaqdı. Bu da bizim xeyrimizə olmayacaqdı. Ümumilikdə, ötən müddət ərzində 231 milyon ton "mənfəət nefti"nin əldə olunması Azərbaycanın uğurudur".
Vidadi ORDAHALLI
