Müslüm İbrahimov: "SOCAR istiqrazlarına xarici ölkə vətəndaşlarının maraq göstərməsi onun göstəricisidir ki..."
Azərbaycan Dövlət Neft Şirkətinin (SOCAR) buraxdığı istiqrazları xarici ölkə vətəndaşları da almağa başlayıb. Bu barədə "SOCAR Capital" şirkətinin yaydığı məlumatda qeyd olunur. Məlumata görə, SOCAR-ın qiymətli kağızlarına ən çox maraq göstərən Azərbaycanla həmsərhəd ölkələrin - Rusiya, Gürcüstan və Türkiyə vətəndaşlarıdır.
İstiqrazlara marağın artması onların qiymətinin yüksəlməsinə səbəb olub. Qiymətli kağızlar üzrə market-meyker xidməti göstərən "PSG Kapital" investisiya şirkətinin məlumatına görə, hazırda SOCAR istiqrazları 1012 dollardan alınır, 1 015,5 dollardan satılır.
Qeyd edək ki, ilk dəfə olaraq istiqrazlara görə rüblük faizlər ödəniləcək.
Xatırladaq ki, SOCAR-ın daxili bazar üçün nəzərdə tutulmuş istiqrazları 2016-cı ilin oktyabrında buraxılıb. İstiqrazlar 100 mln. dollar həcmində, 5 illik müddətə və illik 5 % gəlirliliklə emissiya edilib. İlkin olaraq abunə yazılışı yolu ilə satılan istiqrazlara investorlar tərəfindən tələbat 2 dəfə artıq olub. Oktyabrın 17-dən isə SOCAR istiqrazlarının təkrar bazarda dövriyyəsinə başlanıb. Faiz ödənişləri ildə 4 dəfə həyata keçiriləcək.
SOCAR istiqrazlarına xarici ölkə vətəndaşlarının maraq göstərməsinə fikir bildirən iqtisad elmləri doktoru Müslüm İbrahimov "Bakı-Xəbər"ə açıqlamasında qeyd etdi ki, SOCAR Cənubi Qafqaz regionunda ilk və yeganə transmilli şirkətdir: "SOCAR istiqrazlarına xarici ölkə vətəndaşlarının maraq göstərməsi təbii haldır. SOCAR-ın bir neçə ölkədə nümayəndəliyinin olması və həmin yerlərə sərmayə yatırması onu göstərir ki, beynəlxalq şirkət olaraq, onun istiqrazları tək Azərbaycan yox, bütün dünyada satıla bilər. Yaxşı olar ki, gələcəkdə SOCAR-ın istiqrazları və sərmayələri iri fond birjalarında satılsın. Məsələn, London və ya Nyu-York iri fond birjalarında SOCAR-ın istiqrazları satıla bilər".
Həmsöhbətimiz hesab edir ki, SOCAR istiqrazlarına xarici ölkə vətəndaşlarının maraq göstərməsi onun göstəricisidir ki, güclü bir portfel investisiyalarının Azərbaycana gəlməsinə şərait yaradır: "Adətən Azərbaycanda birbaşa investisiya portfel investisiyadan daha yüksək olub. Çünki xarici investorlar bizim şirkətlərə böyük maraq göstərmirdi. Ancaq SOCAR-ın transmilli şirkət olması xarici investorların Azərbaycan şirkətlərinə marağını artırır. SOCAR vasitəsilə Azərbaycanda portfel investisiyaların cəlb olunması prosesi stimullaşdırılıb. Bu çox gözəl və təqdirəlayiq haldır. SOCAR-da fəaliyyət göstərən işçilər kompetentliyinə görə şübhə yaratmır. Onlar yaxşı bilir ki, şirkətin sərmayə və istiqrazlarının satışında hansı qaydalar var. Və o qaydalardan düzgün istifadə olunduğuna əmindirlər".
Həmsöhbətimiz sonda əminliklə bildirdi ki, SOCAR gələcəkdə daha da iri transmilli şirkət olacaq.
Günel CƏLİLOVA
