Əkrəm Həsənov: "Ola bilsin ki, Naxçıvan sakinləri Türkiyə banklarında kredit götürür deyə, yerli banklarla rəqabət var"
Azərbaycanda regionların kreditləşməsi 2015-ci ilin müvafiq dövrü ilə müqayisədə 704 359,9 min manat və ya 22,1 % azalaraq 2016-cı il dekabrın 1-nə 2 479 002,9 min manat təşkil edib.
Azərbaycan Mərkəzi Bankının məlumatına əsasən, regionların kreditləşməsinin məcmu kreditlərdə xüsusi çəkisi də illik müqayisədə 1,75 % bənd azalaraq 2016-cı il dekabrın 1-nə 15,23 % təşkil edib.
Azərbaycanın iqtisadi rayonları arasında ən bahalı kreditlər Aran, ən ucuz isə Naxçıvan iqtisadi rayonunda verilib. Belə ki, 2016-cı il dekabrın 1-nə Azərbaycanda kreditlər üzrə ən yüksək orta faiz dərəcəsi 22,6 % olmaqla Aran iqtisadi rayonunda, ən aşağı isə Bakı şəhərindən sonra (9,2 %) 12,6 faiz olmaqla Naxçıvan iqtisadi rayonunda qeydə alınıb.
Onu da qeyd edək ki, 113 028,4 min manat və ya 0,69 %-i Naxçıvan iqtisadi rayonunun payına düşüb.
Məlumat üçün bildirək ki, iqtisadiyyatın bütün sahələrini əhatə edən kredit qoyuluşunun ümumi həcmi 1 oktyabr 2016-cı il tarixə muxtar respublika üzrə 103 milyon 831 min manat təşkil edib. Portfelin 9 milyon 513 min manatı qısamüddətli, 94 milyon 318 min manatı isə uzunmüddətli kreditlərin payına düşüb.
Ucuz kreditlərin Naxçıvanda qeydə alınmasına münasibət bildirən bank sahəsi üzrə mütəxəssis Əkrəm Həsənov "Bakı-Xəbər"ə açıqlamasında qeyd etdi ki, digər bölgələrlə müqayisədə Naxçıvan hər zaman seçilib. Qaydalara riayət olunması, təmizkarlıq, əhaliyə diqqət və onların xeyrinə qərarların verilməsi kimi hallar daha çox bu bölgədə müşahidə olunur.
İqtisadçının fikrincə, ən aşağı kreditin Naxçıvanda verilməsinin bir neçə səbəbi var: "Ola bilsin ki, Naxçıvan sakinləri Türkiyə banklarında kredit götürür deyə, yerli banklarla rəqabət var. Digər səbəb isə Naxçıvan MR rəhbərliyinin banklara göstərişi ilə əhaliyə daha aşağı faizlə kredit verilməsidir. Bu hal alqışlanmalıdır. Digər bölgələrlə müqayisədə ucuz kreditin Naxçıvanda verilməsi sevindiricidir".
Günel CƏLİLOVA
