"Bunun nəticəsində Neft Fondunun üzərinə ağırlıq düşmədi"
Məlum olduğu kimi, "Cənub Qaz Dəhlizi" Qapalı Səhmdar Cəmiyyəti (CQD) və Dünya Bankı arasında Trans-Anadolu Təbii Qaz Boru Kəməri (TANAP) layihəsinin dəstəklənməsi məqsədilə kredit ayrılmasına dair müqavilə imzalanıb.
400 milyon ABŞ dolları məbləğində olan kredit sazişini CQD-nin baş direktoru Əfqan İsayev və Dünya Bankının Cənubi Qafqaz üzrə regional direktoru Mercy Tembon imzalayıb. Kredit müqaviləsinə dair zəmanət sazişi isə Azərbaycan Hökuməti adından maliyyə naziri Samir Şərifov və xanım Mercy Tembon arasında imzalanıb.
Maliyyə naziri S.Şərifov bildirib ki, beynəlxalq maliyyə qurumları ard-arda "Cənub Qaz Dəhlizi" layihəsinin həyata keçirilməsi üçün dəstək verir və bu, dünya miqyasında Azərbaycana, onun liderliyi və təşəbbüskarlığı ilə reallaşdırılan CQD layihəsinə inam və etibarının bariz nümunəsidir.
Məlumat üçün qeyd edək ki, CQD layihəsinin məqsədi "Şahdəniz" qaz-kondensat yatağının istismarının ikinci mərhələsinin işlənməsi, bu zaman hasil ediləcək təbii qazın genişləndiriləcək Cənubi Qafqaz Qaz Boru Kəməri və yeni tikiləcək TANAP və Trans-Adriatik Boru Kəməri (TAP) vasitəsilə Türkiyə və Cənubi Avropaya ixracını təmin etməkdir.
"Cənub Qaz Dəhlizi" QSC Azərbaycan Respublikası Prezidentinin "Şahdəniz qaz-kondensat yatağının istismarının ikinci mərhələsi və "Cənub Qaz Dəhlizi"nin yaradılmasına dair digər layihələrlə bağlı bəzi tədbirlər haqqında" 25 fevral 2014-cü il tarixli, 287 nömrəli Sərəncamı əsasında yaradılıb və səhmlərinin 51 %-i dövlət mülkiyyəti olmaqla İqtisadiyyat Nazirliyinə, 49 %-i isə SOCAR-a məxsus olan qapalı səhmdar cəmiyyətidir.
Maraqlıdır, bəs ekspertlər sözügedən layihə ilə bağlı DB ilə imzalanan sazişi necə dəyərləndirir?
Məsələyə münasibət bildirən Neft Araşdırmaları Mərkəzinin rəhbəri İlham Şabanın sözlərinə görə, belə bir sazişin imzalanması doğru addım idi: "2014-cü ildə "Cənub Qaz Dəhlizi" QSC-nin yaradılması doğru və çox düşünülmüş bir addım idi. Həmçinin, Azərbaycanın "Şahdəniz-2", ondan sonra Cənubi Qafqaz Qaz Boru Kəmərinin genişləndirilməsi, TANAP və TAP layihələrində payının maliyyələşdirilməsi və effektiv maliyyə resurslarının cəlb edilməsi məqsədilə atılan addım idi. Ona görə ki, bunun nəticəsində Neft Fondunun üzərinə ağırlıq düşmədi. Qərara alındı ki, Neft Fondundan layihələrə cüzi miqdarda vəsait ayrılsın. İndiyəcən ümumilikdə layihələrə Fonddan xərclənən vəsait heç 1 milyard dollar deyil. Əsas resurs xarici maliyyələşmə götürülüb. Ona görə də danışıqlar aparıldı və əsasən də 2016-cı ildən başlayaraq kredit resursları cəlb edilməyə başlandı. Ötən ilin martında layihəyə 1 milyard dollar məbləğində istiqraz cəlb edildi. Ondan sonra ilin sonunda xarici maliyyə mənbələri hesabına 400 milyon dollar DB-dən, 600 milyon dollar Asiya İnkişaf Bankından kredit cəlb olundu. Ümumilikdə, bu layihəyə 1 milyard dollar istiqraz, 1,5 milyard dollar kredit cəlb olunur. Eyni zamanda, 1,2 milyard dollar kreditin cəlb olunması barədə razılıq əldə olunub. Bunun müsbət tərəfi odur ki, kredit 30 il müddətinə qaytarılacaq və qarşıdaki 5 ildə faiz ödənilməyəcək. Saziş imzalandığı gündən deyil, qazın satılacağı gündən qüvvəyə minəcək. Üstəgəl, kreditin faiz dərəcələri çox aşağıdır. Bu, 2 faizdən aşağıdır". Vidadi ORDAHALLI
