Zakir Əhmədov: "Sahibkarlar çalışacaq ki, vergi öhdəliklərini vaxtında icra etsin"
Xəbər verildiyi kimi, Vergilər Nazirliyi ölkənin regionlarında vergi ödəyiciləri ilə görüşlərə başlayıb. Məlumata görə, ilk görüş Quba şəhərində, 3 saylı Ərazi Vergilər İdarəsinin əhatə dairəsinə düşən Xaçmaz, Quba, Qusar və Şabran rayonlarının sahibkarları ilə keçirilib.
Görüşdə çıxış edən vergilər nazirinin müavini Sahib Ələkbərov bu il Vergi Məcəlləsinə həm həcm, həm də mahiyyət baxımından olduqca ciddi dəyişikliklərin edildiyini bildirib. Qeyd olunub ki, bu dəyişikliklərin əsas məqsədi sahibkarlığın, xüsusilə də kiçik və orta biznesin inkişafına daha əlverişli şəraitin yaradılması, vergi yükünün azaldılması, sahibkarların hüquqlarının daha etibarlı qorunması, vergi orqanları və sahibkarlıq subyektləri arasında qarşılıqlı etimadın səviyyəsinin yüksəldilməsi, nağdsız əməliyyatların həcminin artırılması, vergi mühitinin cəlbediciliyinin artırılması yolu ilə iqtisadiyyata investisiya qoyuluşlarının təşviq edilməsi, dürüst və şəffaf uçotun qurulmasıdır.
S.Ələkbərov ölkə başçısının təşəbbüsü ilə qəbul olunmuş "Vergi ödəyicilərinin 2017-ci ilin 1 yanvar tarixinə mövcud olan vergi borclarının tənzimlənməsi haqqında" Qanunun əhəmiyyətinə toxunaraq bildirib ki, bu qanun sahibkarların maliyyə vəziyyətinin sağlamlaşdırılmasına, onların sərəncamında əlavə vəsaitlərin qalmasına, sahibkarlığın inkişafının stimullaşdırılmasına və daha əlverişli biznes mühitinin formalaşdırılmasına xidmət edir. Nazir müavini yaranmış borclar üzrə hesablanmış faizlərin və Vergi Məcəlləsinin 58.7-ci maddəsinə əsasən, hesablanmış maliyyə sanksiyalarının tam silinəcəyini, digər maliyyə sanksiyaları üzrə isə müəyyən edilmiş şərtlər daxilində silinmələrin nəzərdə tutulduğunu bildirib, sahibkarları bu qanunun yaratdığı imkanlardan maksimum yararlanmağa çağırıb.
Bütövlükdə, Vergilər Nazirliyinin regionlarda keçirdiyi görüşlər bölgələrdə sahibkarların vergi amnistiyasında iştirakına nə kimi müsbət təsir göstərəcək? Məsələyə münasibət bildirən ekspert Zakir Əhmədovun fikrincə, Vergilər Nazirliyinin bu yöndə apardığı işlər ümumi işin xeyrinədir: "Təbii ki, regionlarda keçirilən bu kimi silsilə tədbirlər həm da maarifləndirmə xarakterlidir. Regionlarda fəaliyyət göstərən sahibkarlar bunun müsbət tərəflərini anlayır və nəticədə bundan istifadə edir. Bu da, öz növbəsində, vergi sahəsində işlərin daha rəvan getməsinə öz müsbət təsirini göstərir. Sahibkarlar çalışacaq ki, vergi öhdəliklərini vaxtında icra etsin. Bu həm də vergi mədəniyyətinin yüksəlməsinə xidmət edir. Hesab edirəm ki, regionlarda fəaliyyət göstərən sahibkarlar bu işdə daha yaxından iştirak edəcək". Vidadi ORDAHALLI
