"Hökumət də çalışmalıdır ki, növbəti dövrlərdə plastik kartlardan daha çox istifadə edilərək, aparılan əməliyyatların sayında artım olsun"
Azərbaycanın kommersiya banklarının kredit kartları ilə həyata keçirilən əməliyyatların həcmi aylıq müqayisədə 10 mln. manat və ya 7,6 % artaraq 2016-cı ilin noyabr ayında 142 mln. manat təşkil edib.
Mərkəzi Bankın məlumatına görə, kredit kartları ilə ölkə daxilində həyata keçirilən əməliyyatların həcmi, 50 mln. manatı ATM-lər, 37 mln. manat POS-terminallar vasitəsilə olmaqla, 87 mln. manat təşkil edib. Bu da aylıq müqayisədə 10 %-dən çox artım deməkdir. Hesabata əsasən, ATM-lər vasitəsilə əməliyyatların həcmi 4,2 %, POS-terminallar vasitəsilə əməliyyatların həcmi 19,4 % artıb.
Dövriyyədə olan kredit kartlarının sayında isə, əksinə, noyabr ayında azalma qeydə alınıb. Kredit kartlarının sayı noyabrda 18 min ədəd və ya 2,6 % azalaraq dekabrın 1-nə 670 min ədəd təşkil edib.
Kredit kartları ilə həyata keçirilən əməliyyatların artması barədə fikir bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, statistik rəqəmlərə görə, hazırda 6 milyon kart var: "Heç də o kartların hamısı istifadə olunmur. Ancaq buna rəğmən, kredit kartlarından istifadə olunursa, aparılan əməliyyatların sayında artım qeydə alınır. Bunun da müəyyən səbəbləri var.
Səbəblərdən biri manatla kredit kartlarının saxlanmasıdır. Sonra həmin kart digər xarici valyuta formasında nağdlaşdırılır. Vətəndaş konvertasiya faizi ödəməklə kredit kartını nağdlaşdıra bilir".
Həmsöhbətimiz onu da əlavə etdi ki, xaricdən sifariş olunub ölkəyə gətirilən malların həcminin artması kredit kartlarına marağı artırır: "Vətəndaşlar xarici ölkələrin xidmətlərindən yararlanmaq üçün internet üzərindən sifariş verirlər. Bu halda vətəndaşlar öz istəyini həyata keçirmək üçün kredit kartlarından yararlanır".
İqtisadçının sözlərinə görə, daha çox onlayn ticarətdə kredit kartlarından istifadə olunur.
V.Bayramovun sözlərinə görə, hökumət də çalışmalıdır ki, növbəti dövrlərdə plastik kartlardan daha çox istifadə edilərək, aparılan əməliyyatların sayında artım olsun. Çünki bu, iqtisadiyyatda nağdsız əməliyyatların həcminin artmasına imkan yaradır. Plastik kartla keçirilən əməliyyatların sayında artım olarsa, büdcəyə daxil olan verginin də həcmi yüksələr.
Günel CƏLİLOVA
