Oqtay Haqverdiyev: "Qeyri-neft sektoru məhsullarının ixracında artım tendensiyası yaxın zamanlarda özünü lap çox göstərəcək"
2016-cı ilin yanvar-noyabr aylarında Azərbaycan Respublikasının hüquqi və fiziki şəxsləri dünyanın 183 ölkəsindəki tərəfdaşları ilə ticarət əməliyyatları həyata keçirib, 114 ölkəyə məhsul ixrac edilib, 173 ölkədən idxal olunub.
Dövlət Statistika Komitəsinin yaydığı məlumata görə, gömrük orqanlarında qeydiyyatı aparılan, lakin gömrük rəsmiləşdirilməsi tam başa çatdırılmayan ixrac olunan xam neft və təbii qazın statistik qiymətləndirilmiş dəyəri nəzərə alınmaqla, 2016-cı ilin yanvar-noyabr aylarında xarici ticarət dövriyyəsi 19606,2 milyon ABŞ dolları, o cümlədən ixracın dəyəri 11 milyard 889,5 milyon dollar, idxalın dəyəri 7 milyard 716,7 milyon dollar təşkil edib, nəticədə 4 milyard 172,8 milyon dollarlıq müsbət ticarət saldosu yaranıb.
Ticarət dövriyyəsinin 36,8 faizi Avropa İttifaqı ölkələri, 12,5 faizi MDB üzvü dövlətləri, 50,7 faizi isə dünyanın digər ölkələrinin payına düşüb.
İxracın dəyərinin 17,1 faizi İtaliyaya, 12,7 faizi Türkiyəyə, 8,4 faizi Tayvana (Çinin əyaləti), 7,0 faizi Almaniyaya, 6,9 faizi İsrailə, 5,2 faizi Fransaya, 4,8 faizi Hindistana, 4,4 faizi Rusiyaya, 3,7 faizi Gürcüstana, 2,8 faizi Xorvatiyaya, qalan 27,0 faizi isə digər ölkələrə göndərilən məhsullar əsasında formalaşıb.
İqtisadçı-ekspert Oqtay Haqverdiyev bildirdi ki, əsasən aqrar məhsullarının ixracında artım qeydə alınır: "Bir çox qonşu ölkələrə aqrar məhsullar göndərilir. Əsasən Rusiyaya kənd təsərrüfatı məhsulları göndərilir. Həmin ölkədə Azərbaycanın təzə tərəvəz məhsullarına böyük ehtiyac var. Bu ehtiyac da ixracın artımına təsir göstərir".
Həmsöhbətimizin sözlərinə görə, aqrar məhsullarla yanaşı, sənaye məhsullarının ixracında da artım var: "Bəllidir ki, ölkədə sənaye parkları tikilib. Sənaye parklarından istehsal olunan materiallar xarici ölkələrə göndərilir".
İqtisadçının fikrincə, qeyri-neft sektoru məhsullarının ixracında artım tendensiyası yaxın zamanlarda özünü lap çox göstərəcək. Çünki qeyri-neft sektorunun inkişafı ilə bağlı görülən işlər sayəsində bu sahədə uğurlar əldə olunacaq. Və istehsal olunan məhsullar yerli tələbatı ödəməklə yanaşı, xarici ölkələrə də göndəriləcək.
Günel CƏLİLOVA
