"İxracın subsidiyalaşdırılması ilə bağlı addımlar müəyyən qədər müsbət təsir göstərə bilər"
"Son illər ölkə həyatının bütün sahələrində reallaşdırılan məqsədyönlü tədbirlər öz uğurlu nəticələrini verib". Prezident İlham Əliyevin Davos İqtisadi Forumunun rəsmi saytında yayılmış məqaləsində belə yazılır.
Məqalədə bir sıra məqamlara toxunulub. Ölkə başçısı Azərbaycanda sənaye parklarının yaradılmasından, pambıq, tütün, fındıq, çay, barama və digər ixracyönlü məhsulların istehsalının artırılmasından da bəhs edib.
Eyni zamanda, Prezidentin məqaləsində qeyd olunub ki, 2017-ci il Azərbaycan iqtisadiyyatının inkişaf ili olacaq. Bununla yanaşı, dövlət başçısı iqtisadiyyatın inkişaf etdirilməsində əsas məqsədin ixracın şaxələndirilməsi olduğunu deyib: "Mən əminəm ki, 2017-ci il Azərbaycan iqtisadiyyatının inkişaf ili olacaq. Biz səmərəli iqtisadi islahatların həyata keçirilməsini davam etdirəcəyik. Eyni zamanda, sosialyönümlü təşəbbüslərin maliyyələşdirilməsini artıracağıq. İqtisadiyyatın şaxələndirilməsi işi, demək olar ki, başa çatmaqdadır. Hazırda ölkəmizin ümumdaxili məhsulunun 70 faizi qeyri-neft sektorunun payına düşür. Bu gün bizim qarşımızda duran əsas məqsəd ixracın şaxələndirilməsidir. 2016-cı ildə atdığımız addımlar bu məqsədə nail olunması işinə xidmət edəcək. Azərbaycan artıq Dünya İqtisadi Forumunun Qlobal Rəqabət Qabiliyyətliliyi İndeksinə görə 37-ci yerdədir (MDB ölkələri sırasında 1-ci yerdə) və biz bu uğuru daha da möhkəmləndirmək əzmindəyik".
Bütün bu deyilənlərin fonunda, ixracatın şaxələndirilməsinə necə nail olmaq olar? Bunun üçün hansı işlər görülməlidir?
Məsələyə münasibət bildirən iqtisadçı-ekspert Rəşad Həsənovun sözlərinə görə, bununla bağlı bir sıra işlər görülməli və ilk növbədə rəqabət mühiti yaradılmalıdır: "Ölkəyə xarici investisiya gəlməlidir. İnnovasiya, biznes və digər məsələlərlə bağlı problemlər var. Həmin problemlər aradan qaldırılmalıdır. Xarici investorların ölkəyə gəlməsi üçün liberal iqtisadi mühit formalaşmalı və vergi-hüquqi mühitdə kifayət qədər ciddi dəyişikliklərə ehtiyac var. Bütün bunların həyata keçirilməsi fonunda, ixracın şaxələndirilməsində müəyyən irəliləyişlərə nail olmaq olar. Hazırda Azərbaycanın ixracı şaxələndirməyə ciddi ehtiyacı var. O baxımdan ki, monovalyuta daxil olması nəticəsində milli valyuta yetərincə risqlə üzləşib. O üzdən, ölkəyə digər mənbələrdən də valyuta axını təmin olunmalıdır. Bu da qeyri-neft məhsullarının ixracı ilə təmin edilməlidir. Belə olduqda, ölkə iqtisadiyyatında hər hansı bir təhlükə yarananda, bu, hansısa problemin yaranmasına səbəb olmaz. Ölkədə ixracın təşviqi ilə bağlı müəyyən addımlar atılır. İxracın subsidiyalaşdırılması ilə bağlı addımlar müəyyən qədər müsbət təsir göstərə bilər. İstənilən halda, yerli istehsal olmalıdır ki, bu istehsalın ixracını təşkil etmək mümkün olsun. Bunda başqa, Azərbaycan brendinin yaradılması ilə bağlı ölkə başçısının sərəncamı ilə 3 milyon manat vəsait ayrılıb. Bu vəsaitlə müəyyən qədər Azərbaycan məhsullarının brendləşdirilməsi, onların təbliği, sərgilərinin təşkili və digər bu kimi məsələlərin həlli nəzərdə tutulub".
Vidadi ORDAHALLI
