Rəsul Cahangirli: "Xüsusən də 2016-cı ildə bu yöndə daha çox işlər görülüb"
Məlum olduğu kimi, Davos İqtisadi Forumunun rəsmi saytında Azərbaycan Prezidenti İlham Əliyevin "2017-ci ildə Azərbaycan iqtisadiyyatının prioritetləri" adlı məqaləsi dərc olunub.
Məqalədə qeyd olunur ki, Azərbaycanın bugünkü uğuru son bir neçə ildə hərtərəfli, konkret və məqsədyönlü səylərin nəticəsidir: "Energetika daxil olmaqla, iqtisadiyyatın müxtəlif sahələrində qlobal layihələrin reallaşdırılması bizim ölkəmizi rəqabətə davamlı edir, həmçinin regional və beynəlxalq əməkdaşlığa öz töhfəsini verir.
Biz, həmçinin, Azərbaycanın tranzit potensialının gücləndirilməsi məqsədilə bir sıra layihələrin həyata keçirilməsinə başlamışıq. Bu gün bizim iqtisadi siyasətimizin prioriteti iqtisadiyyatımızın şaxələndirilməsi prosesini davam etdirmək, qeyri-neft sektorunu inkişaf etdirməkdir".
Prezident məqaləsində onu da yazıb ki, ölkə iqtisadiyyatının şaxələndirilməsi başa çatıb: "Biz effektiv iqtisadi islahatların həyata keçirilməsini davam etdirəcəyik. Eyni zamanda sosialyönümlü təşəbbüslərə xərcləri artıracağıq. Bizim iqtisadiyyatımızın şaxələndirilməsi demək olar ki, yekunlaşıb. Hazırda təxminən ÜDM-in 70 faizi qeyri-neft sektorunun hesabına formalaşır".
Ümumilikdə, ekspertlər iqtisadiyyatda şaxələndirmənin başa çatmasını və ÜDM-in 70 faizinin qeyri-neft sektoru hesabına formalaşmasını necə dəyərləndirir?
Məsələyə münasibət bildirən ekspert Rəsul Cahangirlinin sözlərinə görə, ümumən bu istiqamətdə bir sıra işlər görülüb: "Ümumilikdə, Azərbaycanda iqtisadiyyatın şaxələndirilməsi, neft sektorundan asılılığın mərhələlərlə minimuma endirilməsi gündəmdə olub. Hökumətin yeritdiyi siyasətdə bu faktor önəmli yer tutub. Ancaq o zaman bunun bir neçə ilə həyata keçirilməsi planlaşdırılırdı. Lakin 2014-cü ildə neftin qiymətinin gözlənilmədən və sürətlə düşməyə başlaması bu istiqamətdə işlərin daha sürətlə aparılmasını zərurətə çevirdi. Daxilolmalarda yaranan boşluğu doldurmaq üçün qeyri-neft sektorunun inkişaf etdirilməsi qaçılmaz zərurətə çevrildi. Ona görə də iqtisadiyyatın şaxələndirilməsi istiqamətində ciddi islahatlara start verildi. Xüsusən də 2016-cı ildə bu yöndə daha çox işlər görülüb. O baxımdan hesab edirəm ki, həqiqətən də iqtisadiyyatın şaxələndirilməsi yönündə görülən işlər başa çatıb. Bunun fayda verəcəyinə gəldikdə isə, yaxın illərdə biz bunu görəcəyik".
Vidadi ORDAHALLI
