"Bu, Azərbaycan iqtisadiyyatının inkişafına müsbət təkan verəcək"
Məlum olduğu kimi, Azərbaycanda azad iqtisadi zonaların yaradılması prosesinə start verilib. Prezident İlham Əliyev Bakı şəhəri Qaradağ rayonunun Ələt qəsəbəsində yeni Bakı Beynəlxalq Dəniz Ticarət Limanının ərazisi daxil olmaqla, azad ticarət zonası tipli xüsusi iqtisadi zonanın yaradılması ilə bağlı tədbirlər haqqında
Sərəncam imzalayıb. Məlumata görə, sözügedən dəniz limanında yaradılacaq azad iqtisadi zonaya sərmayə qoyacaq sahibkarların toplantısı keçiriləcək. Toplantıda bir sıra məsələlər, o cümlədən qoyulan tapşırıqların yerinə yetirilməsi müzakirə olunacaq. Ekspertlərin bundan gözləntiləri nədir?
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin fikrincə, investorların toplantısı bu istiqamətdə işləri sürətləndirə bilər: "Biz ixracı artırmaq, ölkənin bir tranzit məkan kimi yerini möhkəmləndirmək istəyiriksə, təbii ki, limanın tikintisi tezliklə başa çatdırılmalıdır. Bu işlərin sürətləndirilməsi azad iqtisadi zonanın yaradılması ilə bağlı işlərin vaxtında görülməsinə müsbət təsir edəcək. Bura investisiya qoyacaq sahibkarlar layihələrini daha tez reallaşdırmağa çalışacaq. Sahibkarların toplantı keçirməsi, müəyyən məsələlərlə bağlı fikir mübadiləsi aparması ümumən işin xeyrinədir. Hesab edirəm ki, orada işlərin vaxtında görülməsi Azərbaycan iqtisadiyyatının inkişafına müsbət təkan verəcək. İndiki məqamda belə layihələrin maksimum tez həyata keçirilməsinə ehtiyac var". Vidadi ORDAHALLI
