Əkrəm Həsənov: "Qanunvericiliyə edilən yeni dəyişikliyə əsasən, bankdan götürülən vəsait nağdlaşdırılarkən 1 faiz dəyərində vergi tutulacaq"
Bu ildən Azərbaycanda banklar müştərilərə kreditləri nağdsız formada verəcək. Bunu Vergilər Nazirliyinin Vergi siyasəti və strateji araşdırmalar departamentinin baş direktoru Samirə Musayeva deyib.
Onun sözlərinə görə, bu, "Nağdsız hesablaşmalar haqqında" Qanunda nəzərdə tutulub: "Müştəri istədiyi qədər vəsait əldə edə bilər. Əgər müştəri vergi ödəyicisi olmayan fiziki şəxsdirsə, vəsait nağdlaşdırılanda ondan vergi tutulmayacaq. Əgər müştəri sahibkarlıq fəaliyyəti ilə məşğuldursa, həmin vəsait nağdlaşdırılarkən banklar ödəmə mənbəyindən 1 %-lik sadələşdirilmiş vergi tutmalıdır".
Kredit məbləğinin hansı hesaba köçürülməsi müştəri ilə bank arasında tənzimlənəcək. Kredit məbləğinin nağdlaşdırılması zamanı hüquqi şəxslər və fərdi sahibkarlar 1 %-lik vergi ödəməli olacaq.
Nağdsız hesablaşmaların xüsusilə də kreditləşmə zamanı yaranmış mübahisələrin həlli olacağı gözlənir. Başqa sözlə, bank işçisi ilə müştəri arasında proses daha şəffaf olacaq. Məsələyə münasibət bildirən bank sahəsi üzrə mütəxəssis Əkrəm Həsənov "Bakı-Xəbər"ə açıqlamasında bunları dedi: "Mərkəzi Bankın kommersiya banklarında hesabın açılması və bağlanması haqqında qaydaları var. Bu qaydalara əsasən, istənilən şəxs bankdan kredit götürən zaman bankda onun adına hesab açılır. Həmin vəsait hesaba köçürülür. Bank kredit götürənə pulu nağdsız formada verir. Sonra isə vətəndaş həmin pulu öz hesabından çıxarır".
Həmsöhbətimizin sözlərinə görə, banklar tərəfindən vətəndaşlara kredit kart vasitəsilə verilirdi. Kart da bank hesabına bağlıdır.
İqtisadçı onu da əlavə etdi ki, qanunvericiliyə edilən yeni dəyişikliyə əsasən, bankdan götürülən vəsait nağdlaşdırılarkən 1 faiz dəyərində vergi tutulacaq.
Həmsöhbətimiz hesab edir ki, nağdsız hesablaşmaların xüsusilə də kreditləşmə zamanı yaranan mübahisələrin həlli olacağı gözlənir: "Bank işçisi ilə müştəri arasında proses daha şəffaf olacaq".
Günel CƏLİLOVA
