"Vergi amnistiyası, bir sıra ölkələrdə olduğu kimi, Azərbaycanda da maliyyə amnistiyası ilə tamamlanmalıdır"
Neftin qiymətinin aşağı düşməsi, qeyri-neft sektorunun inkişaf etdirilməsi kimi məsələlər ölkədə maliyyə amnistiyası məsələsini yenidən gündəmə gətirib. Maliyyə amnistiyası bəzi dünya ölkələrinin adətən iqtisadiyyatın maliyyə çatışmazlığı ilə üzləşdiyi dövrlərdə atdığı addımdır.
Bəziləri bu qanunun Azərbaycanda tətbiq olunmamasını onunla əsaslandırır ki, kiminsə qeyri-leqal pullarını ortaya çıxaracağına inam yoxdur. Halbuki, belə bir qanun olsa, o zaman iqtisadiyyata sərmayə qoyuluşu artacaq. Digər tərəfdən, maliyyə amnistiyasının şərtləri dəqiq və şəffaf olmalıdır. Əks halda, onu həyata keçirmək mümkün olmayacaq. Həmçinin, kapitalın sərbəst hərəkətinə və təhlükəsizliyinə zəmanət verilməlidir. Hazırda hökumətin qarşısında duran başlıca vəzifələrdən biri daxildə əlavə maliyyə qaynaqlarının tapılması və xaricdən birbaşa investisiyaların cəlb edilməsi üçün əlverişli biznes mühitinin yaradılmasıdır. Çünki qənaət özlüyündə ictimai vəsaitlərin istifadəsində rasionallığı və səmərəliliyi artırsa da, bu, sonsuzluğa qədər davam edə bilməz. Biznesin fəaliyyət imkanlarının genişləndirilməsi isə əlavə maliyyə qaynaqlarının təmini üçün çox vacibdir. Ona görə də maliyyə amnistiyası elan olunmalıdır. Kimin nə əmlakı varsa, üzə çıxarsın, qeydiyyatdan keçirsin və bunun haradan əldə edildiyi soruşulmasın. Təki iqtisadiyyatımız inkişaf etsin. Belə məlumatlar dolaşır ki, bəzi məmurların, iş adamlarının xarici banklarda böyük həcmdə vəsaiti var. Maliyyə amnistiyası elan edilsə, həmin vəsait iqtisadiyyata yatırılacaq.
Maraqlıdır, bəs ekspertlər ölkədə maliyyə amnistiyasının elan olunmasına necə yanaşır? Sözügedən məsələni dəyərləndirən iqtisadçı, millət vəkili Əli Məsimlinin fikrincə, maliyyə amnistiyası qəbul olunsa, yeni imkanlar yaranacaq: "Biz çalışmalıyıq ki, nəzərəçarpan nəticə əldə edək. Bunun üçün bir neçə şərt tələb olunur. Vergi borclarının, həmin qanunvericilik sənədində göstərildiyi kimi, silinməsi hələlik texniki xarakter daşıyır. Elə mexanizmlərin yaradılmasına çalışmalıyıq ki, bir neçə aydan sonra və ya ilin sonunda yeni vergi borcları yığılmasın. Hesab edirəm ki, islahatları bu istiqamətdə davam etdirmək lazımdır. Vergi, maliyyə və digər amnistiyalarda 3 ay müddətin qoyulması nadir hadisədir. Düşünürəm ki, bu proses 6 aya uyğunlaşdırılsa, daha məqsədəuyğun olar. Vergi amnistiyası, bir sıra ölkələrdə olduğu kimi, Azərbaycanda da maliyyə amnistiyası ilə tamamlanmalıdır. Belə olan halda, burada xeyli dərəcədə əlavə imkanlar yarana bilər. Xüsusilə də indiki zamanda iqtisadiyyata maliyyə vəsaiti qoymaq nöqteyi-nəzərindən mühüm əhəmiyyət kəsb edə bilər".
Vidadi ORDAHALLI
