"Bank Respublika": "Bankın bütün ofislərində fiziki və hüquqi şəxslər ABŞ dollarını istənilən məbləğdə əldə edə bilər"
"Unibank" Samir: "Bu barədə növbəti həftə açıqlama veriləcək"
Valyuta mübadilə məzənnəsinin təyin olunması zamanı banklara qoyulan 4 faizlik marjanın aradan qaldırılması ilə bağlı qərar müsbət qarşılanır. Azərbaycanda fəaliyyət göstərən kommersiya bankları nağd valyuta satışını bərpa etməyə başlayıb. Buna baxmayaraq, hələ də bəzi banklar valyuta satışı həyata keçirmir, əksər banklarda isə satışda müxtəlif limitlər tətbiq olunur.
Aparılan ilkin monitorinqin nəticələrinə əsasən, hazırda "AG Bank" ASC-də valyuta alışı aparılsa da, satış yoxdur. "Dəmirbank" ASC, "Muğanbank" ASC, "Xalq Bank" ASC və "Ziraat Bank Azərbaycan" ASC də satış həyata keçirmir.
Hazırda dollar satışı, kassa qalığından asılı olaraq, "Atabank" ASC, "Azərbaycan Beynəlxalq Bankı" ASC, "AFB Bank" ASC, "Azərbaycan Sənaye Bankı" ASC, "CDB Bank" ASC, "Nikoil Bank" ASC, "Bank Avrasiya" ASC və "Bank BTB" ASC-də (yalnız filiallarda) aparılır. Bu isə o deməkdir ki, müştərinin tələbinin ödənilməsi kassadakı cari vəziyyətdən asılıdır.
"Azər-Türk Bank" ASC-də maksimal satış limiti 10 min dollardır. "Amrahbank" ASC-nin baş ofisində 100-150 dollar almaq mümkündür, avro satışı yoxdur, filiallarda isə limit fərqlidir. "Rabitəbank" ASC-də 1000 dollaradək, "Silkway Bank" ASC-də 300 dollar, yaxud 200 avroya, "Turanbank" ASC-nin filiallarında 500 dollaradək (baş ofisdə isə satış həyata keçirilmir), "Unibank" ASC-də 3000 dollaradək, "Bank of Baku" ASC-nin "Mərkəz", "S.Vurğun" filiallarında və baş idarədə 1000 dollaradəkdir. Məsələ ilə əlaqədar bir sıra banklarla əlaqə saxladıq. "Bank Respublika"dan adını açıqlamayan şəxs "Bakı-Xəbər"ə bildirdi ki, artıq sözügedən bank dolların məhdudiyyətsiz satışını təmin edib: "Bank Respublika"nın bütün ofislərində fiziki və hüquqi şəxslər ABŞ dollarını istənilən məbləğdə əldə edə bilər. Bununla bağlı heç bir problem yoxdur. Hazırda bankda ABŞ dollarının satışı 1.8600 AZN məzənnəsi ilə həyata keçirilir".
"Unibank"dan Samir adlı şəxs qəzetimizə açıqlamasında bildirdi ki, dolların satışı bərpa olunub: "Ancaq bu barədə növbəti həftə açıqlama veriləcək. O üzdən, əlavə məlumat verə bilmərəm".
Məsələ ilə əlaqədar digər bankların mövqeyini öyrənməyə çalışsaq da, mümkün olmadı. Vidadi ORDAHALLI
