Fikrət Yusifov: "Bəzi məhsullara ölkədən çıxarılmasını məhdudlaşdırmaq məqsədilə yüksək rüsumların tətbiq edilməsi hallarına müxtəlif ölkələrin təcrübəsində rast gəlmək mümkündür"
Azərbaycandan ixrac zamanı ixrac gömrük rüsumuna cəlb olunan malların siyahısı genişləndirilib. Bu, Nazirlər Kabinetinin "Azərbaycan Respublikasından ixrac zamanı ixrac gömrük rüsumuna cəlb olunan malların siyahısı və ixrac rüsumlarının dərəcələri"nə etdiyi dəyişikliklərdə əksini tapıb.
Dəyişikliyə əsasən, Azərbaycandan ixrac edilən saflaşdırılmış misdən məftil və prokat hazırlanması üçün biçmələr, digər saflaşdırılmış mis, mis əsasında liqaturalar, saflaşdırılmış misdən çubuqlar və profillər, digər mis ərintilərindən çubuqlar və profillər gömrük dəyərlərinin 10 faizi, lakin 1000 kq-a 300 ABŞ dollarından az olmamaqla ixrac rüsum dərəcəsinə cəlb ediləcək.
Bu qərar dərc edildiyi gündən 30 gün sonra qüvvəyə minir və 5 il müddətində qüvvədədir.
Qeyd olunan məsələnin əhəmiyyətindən danışan "Ekonomiks" Beynəlxalq İqtisadi Araşdırmalar Birliyinin sədri, iqtisadi elmlər doktoru Fikrət Yusifov "Bakı-Xəbər"ə açıqlamasında qeyd etdi ki, Nazirlər Kabinetinin "Azərbaycan Respublikasından ixrac zamanı ixrac gömrük rüsumuna cəlb olunan malların siyahısı və ixrac rüsumlarının dərəcələri"nə etdiyi dəyişikliklərdə əsas məhsul mis və misdən hazırlanan məmulatlardır: "Bu dəyişiklikdə məqsəd ölkədən mis və misdən hazırlanan məmulatların çıxarılmasının qarşısını müəyyən qədər almaqdan ibarətdir. Bəzi məhsullara ölkədən çıxarılmasını məhdudlaşdırmaq məqsədilə yüksək rüsumların tətbiq edilməsi hallarına müxtəlif ölkələrin təcrübəsində rast gəlmək mümkündür. Burada məqsəd ölkə daxilində istehsalı az olan və daxili bazarın daha çox ehtiyacı olan məhsulların ölkədən çıxarılmasının qarşısını maksimum almaqdan ibarətdir".
Günel CƏLİLOVA
