Vahid Əhmədov: "Onların hamısı məsuliyyətə cəlb olunmalıdır"
Məlum olduğu kimi, Prezident İlham Əliyev Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasındakı yekun nitqində bank sektorunda olan problemlərə toxunub.
Dövlət başçısı bildirib ki, ötən il ölkə iqtisadiyyatına ən böyük zərbə vuran bank sektoru olub. Onun fikrincə, bu sektorda bir sıra addımlar atılacaq: "Bizim iqtisadiyyatımıza ən böyük zərbə vuran bank sektoru olub. Bank sektorunun təmizlənməsi, sağlamlaşdırılması, şəffaflaşması, beynəlxalq standartlara uyğunlaşması istiqamətində bu il də ciddi addımlar atılacaq. Qanunu pozan şəxslərə qarşı bundan sonra da ciddi mübarizə aparılacaq".
Banklar iqtisadiyyatın lokomotividir. Məsələ ondadır ki, bank sektorunda hər hansı xoşagəlməz hal baş verirsə, bu, avtomatik olaraq, iqtisadiyyatın digər sektorlarına da sıçrayır. Hələ 2012-ci ildə məlumatlar var idi ki, bəzi banklar böyük məbləğdə girovsuz kreditlər verir. Həmçinin, geri qaytarılmayan kreditlərin həcmi heç də bankların elan etdiyi qədər - 3-4 faiz deyil, daha çoxdur. O baxımdan Prezidentin banklarla bağlı səsləndirdiyi iradlar tamamilə haqlıdır.
Maraqlıdır, bəs iqtisadçıların buna münasibəti necədir?
Sözügedən məsələni dəyərləndirən iqtisadçı, millət vəkili Vahid Əhmədovun fikrincə, deyilənlər reallığı əks etdirir. O hesab edir ki, bank sektorunun sağlamlaşdırılması, şəffaflaşdırılması öndə gedən məsələlərdən biridir: "Bank sistemi ilə bağlı məsələ 2016-cı il boyu gündəmdə olub. Çünki Prezident də vurğuladığı kimi, Azərbaycan iqtisadiyyatına 2016-cı ildə ən böyük zərbəni bank sistemi vurub. Mütəmadi olaraq biz bunu Milli Məclisdə və mətbuatda da qaldırmışıq ki, bank sistemində sağlamlaşdırma sistemi getməlidir. Çox təəssüflər olsun ki, bu baş vermədi. Düzdür, Maliyyə Bazarlarına Nəzarət Palatası müəyyən işlər gördü, diaqnostika apardı. Hətta bankları birləşdirməyə çalışdı. Amma alınmadı. Nəhayət, 10 bankı bağladılar. Biz heç vaxt bankların bağlanmasının tərəfdarı olmamışıq. Biz tərəfdarı olmuşuq ki, iri banklar yaradılsın. Çünki bu zaman həmin banklarda iri kapitallar və kreditləşmə yüksək səviyyədə olur. 2016-cı ildə bu prosesin üzərində müəyyən qədər işlədilər. Amma real olaraq fakt ondan ibarətdir ki, bu gün də bank sektorunda ciddi problemlər var. Bank sektorunda dollarla götürülən kreditlərlə bağlı mən və həmkarım Əli Məsimlinin təklifləri var idi. O təkliflər bu günə qədər icra olunmur. Əgər o təkliflər icra olunsa, həm bank sisteminə xeyir olar, həm də əhali müəyyən qədər bu bəladan qurtular. Bu ən ciddi problemlərdən biridir. Bank sektorunda şəffaflıq olmalıdır. Hazırda banklarda dollar satılmır. Niyə? Amma Mərkəzi Bank və Neft Fondu dollar satır. Bunu da banklar alır. Lakin "qara bazar"da dollar var. Yəni burada ciddi məsələlər var. Hazırda bank sektorunda şəffaflıq prinsipi faktiki olaraq yoxdur. Bank rəhbərliyini dəyişməklə məsələnin bitmiş olduğunu hesab edirik. Amma bu belə deyil. Onların hamısı məsuliyyətə cəlb olunmalıdır. Çünki onlar insanları incidirlər, yüksək faizlə kredit verirlər. İnsanlar bankların qarşısında dayanmamalıdır. Banklar gedib insanlara yalvarmalıdır ki, gəlin kredit götürün. Bu sistemi tamamilə dəyişmək lazımdır".
Vidadi ORDAHALLI
