"Daxili turizmin inkişaf etməsi səbəblərindən biri də kənd turizminin formalaşmasıdır"
Turizm artıq bütün dünyada ən gəlirli sahələrdən birinə, geniş və sürətlə inkişaf edən iqtisadi sektora çevrilib. Turizm sektorunun davamlı olaraq inkişaf etməsi və genişlənməsi bu sektoru sosial-iqtisadi tərəqqidə aparıcı qüvvəyə çevirib. Bu özünü yeni iş yerlərinin yaradılması, turizmlə bağlı müəssisələrin və infrastrukturun qurulmasında göstərir.
Turizm sahəsinin inkişafı üçün otellərin sayının çoxalması, turizm obyektlərinin günü-gündən inkişaf etməsi bu sahəyə marağın artmasından xəbər verir.
Tək xarici vətəndaşlar deyil, həmçinin yerli sakinlər də istirahət üçün ölkəmizin səfalı bölgələrini seçir. Bu da ölkədə daxili turizmin inkişafına səbəb olur.
Azərbaycan Prezidenti İlham Əliyev Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasında çıxış edərkən daxili turizmin inkişafına da toxunub. O bildirib ki, keçən il ölkəmizdə 35 mehmanxana tikilib, 25 mehmanxana tikilməkdədir, ümumiyyətlə, mehmanxanaların sayı Azərbaycanda 500-dən çoxdur. Amma tələbat daha da artır, daxili turizm inkişaf edir.
Dövlət başçısı yerli əhalinin daha çox Azərbaycanda istirahət etməyə üstünlük verdiyini qeyd edib:
"Mən çox şadam ki, Azərbaycan vətəndaşları daha çox Azərbaycanda istirahət etməyə üstünlük verirlər. Bizdə gözəl təbiət, gözəl şərait, gözəl mehmanxanalar, istirahət zonaları var. Bu gün bütün dünyadan turistlər Azərbaycana axışırlar. Bu da ölkə iqtisadiyyatına böyük mənfəət gətirir. Biz gələcəkdə turizmdən milyardlarla dollar vəsait qazanacağıq və bu, bizim iqtisadi vəziyyətimizə çox böyük dəstək olacaq".
İqtisad elmlər doktoru Müslüm İbrahimov "Bakı-Xəbər"ə açıqlamasında qeyd etdi ki, Azərbaycanın daxili turizmi günü-gündən inkişaf edir: "Azərbaycanda turizmin inkişafı ilə bağlı "Strateji Yol Xəritəsi"ndə müvafiq müddəalar yer alıb. "Strateji Yol Xəritəsi"ndə daxili turizmin necə inkişaf etdirilməsi və bunun əhəmiyyəti barəsində maraqlı məqamlara rast gəlmək olar".
Həmsöhbətimizin sözlərinə görə, hazırda daxili turizmin inkişaf mərhələsi yaşanır: "Bəllidir ki, devalvasiyadan sonra əcnəbi ölkələrə xarici valyuta ilə səfər etmək, bir növ, sərfəli deyil. Belə olanda daxili turizm xidməti rəqabət qabiliyyətli olacaq. Yerli vətəndaşların daxili turizmdən yararlanması daha səmərəlidir, nəinki xarici ölkələrə üz tutması".
Müsahibimizin sözlərinə görə, hazırda turizm sektorunda elə mütəxəssislər var ki, onlar öz işini yüksək səviyyədə icra edir: "Əvvəl bu sahədə peşəkar kadrların sayı az idi. Ancaq indi vəziyyət müsbətə doğru dəyişir. Həmçinin, turizm ixtisaslarına abituriyentlərin də marağı artıb. Artıq neçə ildir bu sahəyə investisiya yatırılır. İnvestorlar bu sahənin perspektivli olduğunu bildikləri üçün turizm sektoruna investisiya qoyurlar. Turizmin inkişafı dövlətin nəzarətindədir".
M.İbrahimovun sözlərinə görə, ölkədə keçirilən beynəlxalq əhəmiyyətli forumlar, idman yarışları turistlərin sayına təsir edir: "Turistlərin sayının artması səbəblərindən biri də dil məsələsidir. Yəni MBD ölkələrinin vətəndaşları ilə rus dili yaxınlığı var. Həmçinin, vətəndaşlarımızın ingilis dilində də sərbəst danışması turistlərin Azərbaycana gəlməsinə səbəb olur".
İqtisadçı bildirdi ki, daxili turizmin inkişaf etməsi səbəblərindən biri də kənd turizminin formalaşmasıdır: "Tək yerli vətəndaşlar deyil, əcnəbilər də Azərbaycanın dağətəyi bölgələrini görmək istəyir. Şimal və cənub ərazilərində istirahət etmək əksər vətəndaşların istəyidir".
M.İbrahimov onu da əlavə etdi ki, turizm sektorunda "made in Azərbaycan" brendi formalaşır. Xaricilər bu brendlə tanış olduqdan sonra Azərbaycana səfər etmək istəyir: "Xarici vətəndaşların Azərbaycan turizminə maraq göstərməsi yerli vətəndaşların da ölkəmizin səfalı bölgələrində istirahət etmək istəyini formalaşdırır".
Müsahibimiz hesab edir ki, daxili turizmin inkişaf tendensiyası yaxın illərdə daha yüksək səviyyədə müşahidə olunacaq.
Günel CƏLİLOVA
