Qeyri-neft sektorunun inkişafı istiqamətində xüsusi diqqət mərkəzində saxlanan sahələrdən biri də turizmdir. Son dövrlərdə bu istiqamətdə atılan addımlar öz müsbət nəticələrini verib. Azərbaycana gələn turistlərin sayında təkcə son bir ildə xeyli artım olub. Amma belə görünür ki, hökumət əldə olunan nailiyyətlərlə kifayətlənmək niyyətində deyil.
Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyevin səsləndirdiyi fikirlərdən belə məlum olur ki, turizmin inkişafı istiqamətində bundan sonra da hələ xeyli iş görüləcək. Xüsusən də turizm infrastukturunun yaradılması istiqamətində. Məsələnin bu tərəfinə toxunan Prezident qeyd edib: "Keçən il ölkəmizdə 35 mehmanxana tikilib, 25 mehmanxana tikilməkdədir, ümumiyyətlə, mehmanxanaların sayı Azərbaycanda 500-dən çoxdur. Amma tələbat daha da artır, daxili turizm inkişaf edir". Dövlət başçısı yerli əhalinin daha çox Azərbaycanda istirahət etməyə üstünlük verdiyini qeyd edib: "Mən çox şadam ki, Azərbaycan vətəndaşları daha çox Azərbaycanda istirahət etməyə üstünlük verirlər. Bizdə gözəl təbiət, gözəl şərait, gözəl mehmanxanalar, istirahət zonaları var. Bu gün bütün dünyadan turistlər Azərbaycana axışır. Bu da ölkə iqtisadiyyatına böyük mənfəət gətirir. Biz gələcəkdə turizmdən milyardlarla dollar vəsait qazanacağıq və bu, bizim iqtisadi vəziyyətimizə çox böyük dəstək olacaq". Amma hədəfə çatmaq üçün bir sıra vacib işlərin görülməsi də önəmli sayılır. Məsələn, ölkədə ikiulduzlu, üçulduzlu otellərin sayı həddindən artıq azdır. Elə Prezident də Nazirlər Kabinetinin iclasında bunu əsas iradlardan biri kimi tutdu: "Mən hesab edirəm ki, 2017-ci il turizmlə bağlı daha da uğurlu olacaq. Baxmayaraq ki, bu il turistlərın sayı 11 faiz artıb. Ancaq görülən tədbirlər nəticəsində əminəm ki, bu il daha da çox turist gələcək. Burada, əlbəttə ki, bir neçə amil var. İlk növbədə ölkəmizə gəlmək üçün indi heç bir problem yoxdur. Bütün süni əngəllər aradan götürüldü və burada məruzə edildi. "ASAN Viza" və digər xidmətlər vasitəsilə turistlər Azərbaycana maneəsiz gələcək. Bu, ölkə iqtisadiyyatına çox böyük dəstək olacaq. Həm Bakıda, həm də bölgələrdə böyük canlanma olacaqdır. Bizim turizm infrastrukturu da buna hazır olmalıdır. Yenə də sahibkarlar, bax bu amili nəzərə alsınlar. İkiulduzlu, üçulduzlu otellərin tikintisinə daha çox fikir verilməlidir".
Əslində, bundan əvvəl də hökumət dəfələrlə sahibkarlara ölkədə ulduzu az olan otellərin inaşsına daha çox diqqət ayırmağı tövsiyə edib. Amma real vəziyyət hələ də bu sahədə istənilən nəticənin əldə olunmadığını göstərir. Halbuki, Qərbdə, eləcə də turizmin sürətlə inkişaf etdiyi əksər ölkələrdə ikiulduzlu, üçulduzlu otellərin sayı kifayət qədərdir. Məsələn, dünyanın ən çox turist axını olan ölkəsi Fransada istənilən çeşiddə və büdcəyə uyğun otel tapmaq olar. Burada iki və üçulduzlu otellər 15-20 avrodan başlayır. Hətta 10 avroya da yataqxanalar var. Amerikada isə belə otellərin sayı daha çoxdur. Dünyanın ən iri əyləncə və kazino mərkəzi sayılan Las Veqasda ikiulduzlu hoteldə günlük qiymət cəmi 9 dollardır. Britaniya, İtaliya, İspaniya, Türkiyə kimi ölkələrdə də azulduzlu otellərin sayı kifayət qədərdir. Azərbaycanda da artıq bu istiqamətdə genişmiqyaslı işlərin görülməsi vacib sayılır. Ekspertlər də vurğulayır ki, turizmin inkişafı üçün Avropa, Türkiyədə olduğu kimi, ölkəmizdə də iki və üç ulduzlu otellərin olması vacibdir. Bu istiqamətdə real addımların atılması Azərbaycana gələn turistlərin say baxımından artımına səbəb olacaq. Hesab edilir ki, sahibkarların bu sahəyə marağının artması üçün onlara həm də müxtəlif güzəştlər edilməlidir. Məsələn, yerin ayrılması, otellərin tikintisində onlara vergi güzəştləri edilə bilər. Eyni zamanda, o da faktdır ki, iki və üç ulduzlu otellər dövriyyəsinə görə daha çox gəlir gətirən sahədir. Bu arada daha bir məqamı qeyd edək ki, Azərbaycan 2017-ci il üçün turizm marşrutları siyahısına daxil edilib. "The Sunday Times" portalının 2017-ci ildə turistlər üçün təklif etdiyi ölkələr sırasında Azərbaycan və Bakı haqqında ətraflı məlumat yerləşdirilib. Burada bildirilir ki, Asiya ilə Avropanın qovşağında yerləşən Azərbaycan Qərb və Şərq mədəniyyətlərini yaşadan bir ölkədir. Məlumatda ölkənin dekabr ayında Asiya üzrə ən çox ziyarət edilən istiqamətlər sırasında olduğu qeyd olunur. "Azərbaycanın populyarlığının artması turistlərin buradakı otellər, restoranlar və görməli yerlər haqqında müsbət rəyləri ilə müəyyən olunur. Turistlər arasında getdikcə bu ölkəyə maraq artır". Məhz bu vəziyyətdə ölkəyə gələn turistlərin sayında daha çox artım gözlənir və belə vəziyyətdə ulduz sayı az olan otellərə daha böyük tələbin yaranması da qaçılmaz sayılır.
Tahir TAĞIYEV
