İldırım Qurbanov: "Dağ yamacında yonca, noxud əkən vətəndaş indi öz həyətində 5 kilo kartof əkmir"
"Kənd təsərrüfatı ilə bağlı məsələlər xüsusi diqqət tələb edir. Mən bu sahəyə çox böyük diqqət ayırıram. Çünki bu sahə həm məşğulluqdur, həm inkişafdır, həm ixracdır". Prezident İlham Əliyev bunu Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasında söyləyib.
Dövlət başçısı, ilk növbədə, kənd təsərrüfatı məhsulları hesabına ixracın şaxələndirilməsinin vacibliyini qeyd edib: "Biz realist olmalıyıq. Biz indi texnologiya ixrac edə bilmirik və edə bilmərik, vaxt lazımdır. Biz istədiyimiz səviyyədə maşın, mexanizm ixrac edə bilmirik. Heç özümüzü də təmin edə bilmirik. Biz nəyi ixrac edə biliriksə, diqqətimizi o real sektora yönəltməliyik. Burada kənd təsərrüfatı, emal sahəsi əlbəttə ki, ən böyük potensiala malikdir. Torpaqlardan səmərəli istifadə etməliyik və ixracımızı şaxələndirməliyik. Hesab edirəm ki, biz görüləcək tədbirlər sayəsində kənd təsərrüfatı məhsulları ixracını iki dəfə artıra bilərik. Bu, ölkəmizə daha çox valyuta, kənddə yaşayanlara isə əlavə vəsait gətirəcək".
Dövlət başçısı çıxışında kənd təsərrüfatında bəzi sahələrin adını xüsusi qeyd edib: "Bizə kənd təsərrüfatı məhsulları arasında ən çox valyuta gətirən fındıqçılıqdır və xurma bağlarından əldə edilən məhsulun ixracıdır. Ona görə biz bu iki istiqamətə də çox ciddi fikir vermişik. Keçən il 13 min hektarda fındıq bağları salınmışdır. Müqayisə üçün deyə bilərəm ki, bizim ümumi fındıq bağlarının sahəsi təxminən 30 min hektara yaxındır. Yəni onun üçdəbir hissəsindən çoxunu biz bir il ərzində salmışıq və bu proses davam edir. Qarşıya məqsəd qoyulub ki, 2016-cı ildən başlayaraq bir neçə il ərzində biz əlavə 40 min hektarda fındıq bağları salaq".
Maraqlıdır, bəs ekspertlər kənd təsərrüfatında daha hansı sahələrin inkişaf etdirilməsini məqsədəuyğun hesab edir?
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert İldırım Qurbanov bir sıra məqamlara toxundu: "Əvvəla cənab Prezident çox mühüm məsələyə toxundu. Kənd təsərrüfatı məhsulları istehsalı və ixracı ilə bağlı toxunduğu məqamlar mühüm əhəmiyyət kəsb edir. Dövlət bunu xüsusi diqqət mərkəzində saxlamalıdır ki, boş torpaq sahələri qalmasın, hamısı əkilsin. Bunun üçün bazar hərtərəfli araşdırılmalıdır. Həftədə bir dəfə rayon mərkəzlərində və iri şəhərlərdə yarmarkalar təşkil olunmalıdır. Kəndliyə demək lazımdır ki, ək, becər, biz uyğun qiymətə alarıq. Gömrük Komitəsi daxili bazarın qorunması funksiyasını tam şəkildə işə salmalıdır. Ona görə ki, xaricdən gələn məhsullar daxildə istehsal olunan məhsulları bazardan çıxara bilməsin. Bu kimi məsələlər xüsusi diqqət mərkəzində olmalıdır. İxrac məqsədilə üzümçülük, çayçılıq, kartofçuluq, tərəvəzçilik inkişaf etdirilməlidir. Xüsusən üzümçülük ölkəyə valyuta gətirən sahədir. Sovet dövründə hətta dağların yamacları əkilirdi. Belə ki, dağ yamacında yonca, noxud əkən vətəndaş indi öz həyətində 5 kilo kartof əkmir. Niyə? Bunlar hamısı araşdırılmalıdır. Biz dövlətimizi neft asılılığından qurtarmalıyıq. Artıq anlamaq lazımdır ki neft dönəmi bitdi. Real sektor, daimi istehsal, əmək tutumlu sahələr inkişaf etdirilməlidir. Müvafiq qurumlar dövlət başçısı tərəfindən verilən tapşırıqların yerinə yetirilməsi prosesində fəal iştirak etməlidir. Həm sahibkarlar, həm də məmurlar bu tapşırığa əməl etməli və öz fəaliyyətində bunu rəhbər tutmalıdır". Vidadi ORDAHALLI
