Rəsul Cahangirli: "Bu da, öz növbəsində, qiymətlərin ucuzlaşmasına təsir göstərəcək"
"Ölkədə inşaat sektorunun canlandırılması ilə bağlı bir çox tədbirlər həyata keçirilib". Bunu Prezident İlham Əliyev Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasındakı çıxışında deyib.
Dövlət başçısı bu prosesin insanların həyat şəraitinin yaxşılaşdırılmasına, Bakının daha da gözəlləşməsinə, həm də tikinti materialları bazarının stimullaşdırılmasına xidmət etdiyini bildirib.
Prezident yanında Mənzil İnşaatı Dövlət Agentliyinin fəaliyyətini vurğulayan dövlət başçısı qarşıdakı illərdə paytaxtda 2 minə yaxın sosial mənzilin inşa olunacağını söyləyib: "Keçən ay Yasamal rayonunda Mənzil İnşaatı Dövlət Agentliyinin birinci layihəsinə start verildi. Əminəm ki, bu layihə uğurla icra ediləcək. Layihə çərçivəsində yeni bir şəhərcik yaradılacaq, hündürmərtəbəli 29 yaşayış binasının tikintisi nəzərdə tutulur. Məktəb, uşaq bağçası tikiləcək, infrastruktur yaradılacaq, yollar çəkiləcək. İki minə yaxın mənzil tikiləcək və güzəştli şərtlərlə vətəndaşlara, xüsusilə maddi imkanları məhdud olan ailələrə uzunmüddətli kreditlə veriləcək".
Bütün bu deyilənlərin fonunda, 2000 min sosial mənzilin inşa olunması əhalinin evə olan tələbatının ödənilməsində necə rol oynayacaq?
Məsələyə münasibət bildirən ekspert Rəsul Cahangirlinin fikrincə, bu, aztəminatlı ailələrin mənzillə təmin olunmasında müsbət rol oynayacaq: "Sosial evlərin mənzil bazarına təsirlərini minimumlaşdırmaq üçün nəzərdə tutulub ki, bu minvalla evə olan tələbatın 10 faizi ödənilsin. Birinci mərhələdə vətəndaşlara 2000 mənzil təklif ediləcək. Növbəti illərdə isə 3000 mənzilin vətəndaşlara təklif edilməsi nəzərdə tutulub. Bu isə o deməkdir ki, illik mənzilə olan tələbatın 10 faizi sosial mənzillər tərəfindən ödəniləcək. İndiki dövrdə bu, kiçik rəqəm deyil. Baxmayaraq ki, mənzilə tələbatı olanların sayı bundan qat-qat çoxdur. İstənilən halda, nəzərə almaq lazımdır ki, sosial evlərin inşası mənzil bazarına təsir göstərəcək. Birincisi, bunun mənzil bazarına psixoloji təsirləri var. O mənada ki, insanlar seçim edə biləcək. Digər tərəfdən isə, bunun iqtisadi təsiri var. İqtisadi təsiri ondan ibarətdir ki, mənzil bazarında təklif artacaq. Bu da, öz növbəsində, qiymətlərin ucuzlaşmasına təsir göstərəcək. Nəticədə daha çox ehtiyacı olan mənzillə təmin oluna bilər. Bütün bunlar bir-birilə bağlı olduğu üçün, bazarda müsbət tendensiyanın yaranmasına təkan verə bilər".
Vidadi ORDAHALLI
