Zakir Əhmədov: "Bu, qismən də olsa, əhalinin maddi durumuna müsbət təsir göstərəcək"
"Ötən il Azərbaycanda sosial məsələlərin həlli diqqət mərkəzində olub". Bunu Azərbaycan Prezidenti İlham Əliyev Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasında bildirib.
O qeyd edib ki, maaşlar 7 faiz, pensiyalar 8 faiz artıb və yenə də artmalıdır. Prezidentin sözlərinə görə, bununla yanaşı, kommunal xidmətlərin differensiallaşdırılması da sosial ədalət prinsipinə əsaslanıb, orta təbəqənin maraqları nəzərə alınıb: "Sosial siyasətin tərkib hissəsi kimi 485 məktəb təmir olunub, 29 məktəb tikilib, 41 tibb müəssisəsi inşa edilib və ya təmir olunub. Məcburi köçkünlərin həyat şəraitinin yaxşılaşdırılması diqqətdə saxlanıb".
Dövlət başçısı onu da bildirib ki, "ASAN xidmət" mərkəzlərinin sayı 11-ə çatdırılıb: "İndiyə qədər bu mərkəzlərə 13 milyon müraciət daxil olub və göstərilən xidmətlərin sayı artırılıb".
Bütövlükdə, ekspertlər gözlənilən artımlara necə baxır? Sözügedən məsələni dəyərləndirən ekspert Zakir Əhmədovun fikrincə, təqaüdlərin və minimum əməkhaqları rəsmi inflyasiya qədər indeksləşdirilməlidir: "Qanunun tələbi budur. Çox güman ki, rəsmi inflyasiya elan edildikdən sonra məhz həmin həcmlərdə rəsmi inflyasiya qədər indeksləşmə olacaq. Ehtimal ki, may ayında büdcəyə yenidən baxılma ehtiyacı yaransa, o zaman müvafiq dəyişikliklər baş verə bilər. 2017-ci ilin dövlət büdcəsində təqaüd, pensiya və sosial müavinətlər üçün ayrılan vəsaitdə 12.6 faiz artımın proqnozlaşdırılması sosial xərclərin ümumi məbləğidir. Yəni artım rəsmi inflyasiya qədər indeksləşmə üçün nəzərdə tutulub. Yaxın günlərdə çox güman ki, indeksləşmə ilə bağlı Prezident fərmanı olacaq. Ancaq, istənilən halda, bununla bağlı artımların olması müsbət haldır. Bu, qismən də olsa, əhalinin maddi durumuna müsbət təsir göstərəcək. Hesab edirəm ki, dünya bazarında neftin qiymətində ciddi artım olsa, o zaman maaş və pensiyalar daha çox artacaq. Yəni gedişatdan asılı olaraq büdcəyə yenidən baxılacaq və müvafiq artımlarla bağlı qərar veriləcək".
Vidadi ORDAHALLI
