Zakir Əhmədov: "Ola bilsin bəzi banklar qanunvericilikdə olan boşluqlardan sui-istifadə edərək belə addım atır"
Dollarla bağlı daha bir problem ortaya çıxıb. Məsələ ondadır ki, dollar satmayan banklar xaricdən köçürülən dollarla olan vəsaiti də sahibinə ödəməkdən boyun qaçırır. Bu hadisə Gəncə sakininin başına gəlib.
Qadın övladının xaricdən dollarla göndərdiyi pulu bankdan ala bilmir. Rusiyada yaşayan iki oğlu mütəmadi olaraq ona pul göndərir. Lakin qadın son bir bir neçə aydır dollarla göndərilən pulları bankdan götürə bilmir. İradə Quliyeva Gəncədə yerləşən bir çox bankda eyni mənzərənin müşahidə olunduğunu deyir. Onun sözlərinə görə, bankların bu cür addım atması insanların pulunu göz görə-görə mənimsəməkdən başqa bir şey deyil.
Bəzi mütəxəssislərin fikrincə, bankların belə addım atmasının səbəbi dollar qıtlığının yaranmasıdır. Ancaq bu heç də banka pul köçürmələri ilə bağlı öhdəliyini icra etməmək səlahiyyəti vermir. Belə vəziyyət, açıq-aydın, bank qanunvericiliyinin tələblərinin pozulmasıdır. Hansısa vətəndaş xarici ölkədən göndərilən pulu bankdan ala bilmirsə, bu zaman Maliyyə Bazarlarına Nəzarət Palatasına müraciət edərək öz hüququnu bərpa edə bilər. Onu da qeyd edək ki, banklar hansısa beynəlxalq pulköçürmə şirkəti ilə müqavilə bağlayıbsa, deməli, pul vəsaitinin göndərilən valyutada çatdırılmasına dair öhdəlik götürüb.
Sözügedən məsələni dəyərləndirən ekspert Zakir Əhmədovun fikrincə, bəzi bankların belə addım atması vətəndaşların hüquqlarının pozulması anlamına gəlir: "Bunu dollar qıtlığı ilə əsaslandırmağın heç bir əsası yoxdur. Ona görə ki, pul köçürülməsi dollarla olubsa, bank onu vətəndaşa çatdırmağa borcludur. Köçürmə hansı valyuta ilə aparılıbsa, həmin valyuta ilə vətəndaşa çatdırılmalıdır. Sözügedən şəxs vəsaiti rus rublu ilə köçürsəydi və pulu qəbul edən şəxs bunu dollara çevirib götürmək istəsəydi, o zaman bankları hardasa başa düşmək olardı. Banklar əsaslandırardı ki, dollar rezervləri məhdud olduğuna görə bunu edə bilmirlər. Belədə banklar öhdəliyi yerinə yetirməyə borcludur. Ola bilsin bəzi banklar mövcud vəziyyətdən və qanunvericilikdə olan boşluqlardan sui-istifadə edərək belə addım atır. Fikrimcə, Maliyyə Bazarlarına Nəzarət Palatası bunu araşdırmalı və köçürülən vəsaiti dollarla ödəmək istəməyən banklara xəbərdarlıq etməlidir".
Vidadi ORDAHALLI
