Rəşad Həsənov: "Sahibkarlıq subyektlərinin, prosesin digər tərəflərinin fəaliyyətinin əlaqələndirilməsi nisbətən asanlaşacaq"
2017-2020-ci illərdə Azərbaycanın hər bir regionunda ticarət palatalarının yaradılması nəzərdə tutulur. Bu barədə Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında kiçik və orta sahibkarlıq səviyyəsində istehlak mallarının istehsalına dair Strateji Yol Xəritəsi"ndə deyilir.
Qeyd olunur ki, hər bir regionda sahibkarların hüquqlarının və qanuni mənafelərinin müdafiəsi və onlara dəstək xidmətlərinin göstərilməsi üçün ticarət palatalarının yaradılması imkanları nəzərdən keçiriləcək. Ticarət palataları dövlətlə sahibkar arasında körpü rolunu oynayacaq və öz üzvlərinə beynəlxalq təcrübəyə uyğun olan xidmətlər göstərəcək. Sahibkarların ticarət palatalarına inamını möhkəmləndirmək üçün müvafiq addımlar atılacaq, qabaqcıl ölkələrdə olduğu kimi, palatalara konsultativ statusun verilməsi məsələsi nəzərdən keçiriləcək. Bu, hazırlanan qanun layihələri ilə bağlı palatalarla məsləhətləşmələrin aparılmasına və dövlət orqanları yanında ictimai şuralarda ticarət palatalarının üzvlərinin iştirakına şərait yaradacaq.
Yaradılacaq palataların əsas məqsədi, ilk növbədə, sahibkarların onlara inamının artırılmasından, ölkədə kiçik və orta sahibkarlıq subyektlərinin qarşılaşdığı əngəllərin aradan qaldırılmasından ibarət olacaq. Əsas hədəf kimi palatalara üzv olacaq şirkətlərin ixrac imkanlarının artırılması, bazarda zəif mövqeyə sahib şirkətlər üçün yeni ideyaların verilməsi, maliyyə vəsaitlərinə əlçatanlığın təmin olunması istiqamətləri müəyyənləşdiriləcək.
Qəzetimizə açıqlama verən iqtisadçı-ekspert Rəşad Həsənovun sözlərinə görə, regionlarda ticarət palatalarının yaradılmasında əsas məqsəd kommunikasiya və koordinasiya məsələlərini nisbətən təkmilləşdirmək, müasir dövrün tələblərinə uyğunlaşdırmaqdır: "Bir çox hallarda qısamüddətli biznes tarixi və təcrübəsi sahibkarların öz fəaliyyətini daha çevik şəkildə əlaqələndirməsində və müəyyən istiqamətlərdə birgə təşəbbüskarlığın ortaya qoyulmasında problemlərin yaranmasına səbəb olub. Bu istiqamətdə indiyə qədər tələbin nisbətən aşağı səviyyədə olması və diqqətin zəifliyi kimi amillər zəif dinamikanın əsaslarından hesab olunur. Lakin indiki çağırışlar daha çevik istehsal və məhsulların satışının təşkil edilməsi, ixracqabiliyyətli məhsulların istehsalı və ixracının təmin olunması istiqamətində səylərin birləşdirilməsi və dəstəyin təmin olunması zərurətini ortaya çıxarıb. Ticarət palatalarının yaradılması yolu ilə bu istiqamətdə kommunikasiya daha da təkmilləşdiriləcək. Eyni zamanda sahibkarlıq subyektlərinin, prosesin digər tərəflərinin fəaliyyətinin əlaqələndirilməsi nisbətən asanlaşacaq".
Günel CƏLİLOVA
