Əli Əlirzayev: "Həm yük, həm də sərnişindaşımada bunun ciddi səmərəsi olacaq"
Məlum olduğu kimi, dekabrın 29-da Naxçıvan-Təbriz-Tehran-Məşhəd beynəlxalq sərnişin qatarı xəttə buraxılıb. Bu, iki ölkə arasında əlaqələrin daha da dərinləşməsi baxımından mühüm əhəmiyyət kəsb edir.
Belə ki, qatarla bu marşrut insanlarımızı bir-birinə daha da yaxınlaşdıracaq, gediş-gəliş artacaq, turizm və humanitar sahədə əməkdaşlıq yeni mərhələdə genişlənəcək. Bu, xüsusilə, Naxçıvan Muxtar Respublikası ilə İran İslam Respublikası arasında iqtisadi və turizm əlaqələrinin inkişafında mühüm rol oynayacaq, səmərəli əməkdaşlıq qurulacaq. Qeyd edək ki, Naxçıvan MR ilə İran arasında beynəlxalq sərnişin qatarının xəttə buraxılması "Azərbaycan Respublikası Hökuməti ilə İran İslam Respublikası Hökuməti arasında Azərbaycan və İran dəmir yollarının əlaqələndirilməsi haqqında" 2016-cı il fevralın 23-də Tehran şəhərində imzalanmış Çərçivə Sazişində öz əksini tapıb.
Bir vaxtlar Naxçıvan dəmir yolu vağzalı səsli-küylü yerlərdən biri sayılırdı. Çünki keçmiş SSRİ dönəmində paytaxt Bakıya və ittifaqın digər şəhərlərinə getmək istəyən naxçıvanlıların sıx istifadə etdiyi nəqliyyat növlərindən biri də sərnişin qatarları idi. Ermənistanın təcavüzkar siyasəti bütün sahələrlə yanaşı, dəmir yolu nəqliyyatına da öz sarsıdıcı zərbəsini vurdu. 1990-cı illərin əvvəllərində bütün kommunikasiya xətləri ilə birlikdə, paytaxta doğru uzanan dəmir yolu xətti də bağlandı. Naxçıvan blokada vəziyyətinə salındı. Lakin ötən illər ərzində Azərbaycan dövlətinin apardığı uğurlu siyasət nəticəsində muxtar diyarımız bütün çətinlikləri bir-bir dəf etdi. İndi isə növbə dəmir yolu nəqliyyatına çatıb. Naxçıvanın dəmir yolları şəbəkəsi İran dəmir yolu xətlərinə qoşulmaqla daha geniş areala açılmaq imkanı əldə edib.
Bütün bu deyilənlərin fonunda, Naxçıvan-Təbriz-Tehran-Məşhəd beynəlxalq sərnişin qatarının xəttə buraxılmasının nə kimi strateji əhəmiyyəti var?
Sözügedən məsələni "Bakı-Xəbər"ə şərh edən iqtisadçı-alim Əli Əlirzayevin fikrincə, bunun mühüm strateji əhəmiyyəti var: "Ötən ilin mühüm nailiyyətlərindən biri də sözügedən dəmir yolunun istifadəyə verilməsidir. Hesab edirəm ki, bundan sonra Naxçıvandan Tehrana, Təbrizə və İranın digər şəhərlərinə getmək daha rahat olacaq. Sonra həmin dəmir yolu Astara ilə birləşəcək. Nəticədə qatarla İrandan keçməklə rahat şəkildə Bakıya getmək mümkün olacaq. Qarsdan Naxçıvana dəmir yolu çəkiləndən sonra isə rahat şəkildə Türkiyəyə getmək mümkün olacaq. Ona görə də Naxçıvan-Təbriz-Tehran-Məşhəd dəmir yolu mühüm strateji əhəmiyyət kəsb edir. Həm Naxçıvanda yaşayanlar, həm də İranda olanlar üçün bunun ciddi əhəmiyyəti var. Bütövlükdə, bunun Azərbaycan üçün əhəmiyyəti böyükdür. Həm yük, həm də sərnişindaşımada bunun ciddi səmərəsi olacaq. Fikrimcə, sözügedən dəmir yoluna hər zaman tələbat olacaq".
Vidadi ORDAHALLI
