Rəsul Cahangirli: "Vergi sahəsində aparılan struktur islahatları qeyri-neft sektorunun davamlı inkişafına və..."
Xəbər verildiyi kimi, Vergilər Nazirliyində bir sıra struktur islahatları aparılıb. Dəyişikliklər vergi siyasəti və strateji araşdırmalar, daxili təhlükəsizlik, vergi risqlərinin təhlili və nəzarət, eləcə də hüquq idarələrində baş verib.
Bundan başqa, Vergi ödəyicilərinə xidmət Baş İdarəsi Vergi ödəyicilərinə xidmət və şəffaf vergi partnyorluğu Departamenti, Ərazi vergi orqanları ilə iş üzrə Baş İdarə Ərazi vergi orqanları ilə iş Departamenti, Beynəlxalq əməkdaşlıq və maliyyə təşkilatlarında vergi monitorinqi Baş İdarəsi eyniadlı Departament olaraq adlandırılıb.
Beləliklə, hazırda bu dəyişikliklərlə birgə nazirliyin tərkibində bir baş idarə - Vergi cinayətləri və vergi borclarının alınması işinin təşkili Baş İdarəsi, 11 departament, 3 idarə və şöbə, nazirliyin aparatı, bir bölmə və tədris mərkəzi var.
Bütövlükdə, aparılan bu struktur islahatlarının məzmunu nədən ibarətdir? Məsələyə münasibət bildirən ekspert Rəsul Cahangirlinin fikrincə, bu islahatların məzmunu vergi işinin daha dinamik və rasional qurulmasını özündə ehtiva edir: "Ölkədə yeni iqtisadi inkişaf strategiyasına uyğun olaraq vergi sistemində də geniş islahatlar aparılır. Yeni departamentlərin yaradılması da bu işlərin tərkib hissəsidir. Bu, vergi nəzarətinin və vergitutma bazasının genişləndirilməsinə, vergi daxilolmalarının artırılmasına hesablanıb. Bu qurum ərazi vergi orqanlarının fəaliyyətinə nəzarətin səmərəliliyinin artırılmasını, vergilərin tam həcmdə və vaxtında ödənilməsini təmin edəcək. Eyni zamanda digər işlərin görülməsinə müsbət təsir göstərəcək. Vergi sahəsində aparılan struktur islahatları qeyri-neft sektorunun davamlı inkişafına və sahibkarlıq mühitinin daha da yaxşılaşdırılmasına təkan verir. Bunların nəticəsində dövlət büdcəsinə daxilolmaların məbləği get-gedə nəzərəçarpacaq dərəcədə artır. Ötən il bu işlərin uğurlu aparılması nəticəsində respublikanın 6 şəhər və rayonu öz xərclərini mərkəzləşdirilmiş büdcədən dotasiya almadan, vergilərin hesabına formalaşdıra bilib. Bir məqamı da qeyd edim ki, vergi sahəsində aparılan islahatlar nəticəsində regionlardakı vergi ödəyiciləri sadələşdirilmiş vergini Bakıda fəaliyyət göstərən vergi ödəyiciləri kimi 4 faiz deyil, 2 faiz dərəcəsi ilə ödəyirlər. Bu onların fəaliyyətini stimullaşdırır. Ötən ilin əvvəlindən ticarət və ictimai iaşə sektorunda çalışan vergi ödəyicilərinin fəaliyyəti üçün əlverişli biznes mühitinin yaradılması üçün Vergi Məcəlləsinə dəyişiklik edilərək, ticarət və ictimai iaşə sahəsində dövriyyəsi 200.000 manatdan yuxarı olan sahibkarlara öz seçimi əsasında sadələşdirilmiş vergi ödəyicisi hüququ verilib".
Vidadi ORDAHALLI
