Vüqar Bayramov: "Hər iki tərəfin öhdəliklərinin qanunvericilikdə təsbit olunmasına ehtiyac var"
2017-ci ildə Azərbaycanda lizinq haqqında qanun layihəsi hazırlanacaq. Bu barədə Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında kiçik və orta sahibkarlıq səviyyəsində istehlak mallarının istehsalına dair Strateji Yol Xəritəsi"ndə deyilir.
Qeyd olunur ki, Azərbaycanda lizinqin inkişafı üçün, ilk növbədə, vahid qanunun hazırlanması nəzərdən keçiriləcək. Yeni qanun lizinq şirkətlərinin operativ lizinq xidmətləri göstərməsinə şərait yaradacaq. Yeni qanun əsasında müvafiq normativ-hüquqi baza formalaşdırılacaq və lizinq şirkətlərinin fəaliyyəti üçün daha əlverişli şərait yaradılacaq.
Bundan başqa, 2017-2018-ci illərdə lizinq fəaliyyətinin tənzimlənməsi və güzəştlərin tətbiqi nəzərdə tutulur. Lizinq bazarının daha sürətlə inkişaf etməsi üçün güzəştlərin tətbiq olunması təmin ediləcək və yeni tənzimlənmə mexanizmləri müəyyənləşdiriləcək. Bundan əlavə, ölkə üçün xüsusi əhəmiyyət kəsb edən sektorlarda lizinq üçün əlavə güzəştlərin tətbiqi nəzərdən keçiriləcək. Bu güzəştlər kiçik və orta sahibkarlıq (KOS) subyektləri tərəfindən alternativ maliyyələşmə mənbəyi kimi lizinq xidmətlərindən istifadənin stimullaşdırılmasına şərait yaradacaq.
"Yol Xəritəsi"ndə bildirilir ki, görüləcək tədbirlər nəticəsində yerli və xarici investorların lizinq bazarına və forvard, fyuçers, opsion, svop, faktorinq kimi alternativ maliyyə mənbələrinə marağı artacaq, yerli KOS subyektlərinin bu yolla maliyyələşmə imkanları genişlənəcək. Lizinq bazarının inkişaf etdirilməsi 2020-ci ilədək Azərbaycanda lizinq əməliyyatlarının ÜDM-də payını 2 faizə, 2025-ci ilədək isə 4 faizə çatdırmaq imkanı verəcək. Bu prioritetin icrası üçün əsaslı investisiya tələb olunmur.
Mövzu barədə fikir bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, "Strateji Yol Xəritəsi"ndə lizinq haqqında yeni qanunun hazırlanması da nəzərdə tutulur. Bu da, əsas etibarilə, aqrar sahədə məhsul istehsalına hesablanmış avadanlıqların icarəyə götürülməsini stimullaşdıracaq: "Məsələnin cəlbediciliyi həm də ondadır ki, lizinq sektorunda nəzərdə tutulan yeniliklərin icrası üçün əsaslı investisiya tələb edilmir".
Həmsöhbətimizin sözlərinə görə, hər iki tərəfin öhdəliklərinin qanunvericilikdə təsbit olunmasına ehtiyac var: "Gözlənir ki, yeni qanunun qəbul olunması həm daha ucuz qiymətə lizinq təklifinə, həm də fermerlərin lizinq xidmətindən daha çox yararlanmasına imkan verəcək. Xüsusən də avadanlıq və texnikanın alınmasına deyil, onların istifadə olunmasına ehtiyac var".
V.Bayramovun fikrincə, lizinq haqqında qanunun qəbul olunması bu sektorda əlçatanlığı asanlaşdıracaq.
Günel CƏLİLOVA
