"Dünya Bankı hesabatı hazırlayarkən ölkə əhalisinin gəlirlərinin azalması, azalma fonunda da istehlak qabiliyyətinin zəifləməsini və inflyasiyanın aşağı düşməsini hesablayır"
2017-ci ildə Azərbaycanda inflyasiya səviyyəsi 2,4 faiz təşkil edəcək. 2018-ci ildə isə bu göstərici 2,1 faizə bərabər olacaq. Bu barədə Dünya Bankının Avropa və Mərkəzi Asiya üzrə hesabatında deyilir.
Qeyd edək ki, daha əvvəl Dünya Bankı 2017-ci ildə istehlak qiymətlərinin 4,1 faiz artacağını proqnozlaşdırmışdı.
Hesabatda qeyd olunur ki, bank Azərbaycanda inflyasiyanı 2016-cı il üçün 12 faiz səviyyəsində proqnozlaşdırıb.
Bildirək ki, 2016-cı ilin 10 ayı ərzində Azərbaycanda istehlak qiymətləri və xidmət tarifləri 2015-ci ilin eyni dövrü ilə müqayisədə 11,6 faiz artıb.
Azərbaycan hökumətinin hazırladığı sosial-iqtisadi inkişaf konsepsiyasının layihəsinə əsasən, 2017-ci ildə inflyasiya 7,3, 2018-ci ildə isə 4,9 faiz proqnozlaşdırılır.
Bundan başqa, Dünya Bankı Azərbaycanda ümumdaxili məhsulun artımını 2017-ci il üçün 1,2 faiz, 2018-ci il üçün 2,3 faiz olaraq proqnozlaşdırıb. Azərbaycan hökumətinin proqnozlarına əsasən, bu göstəricilər, müvafiq olaraq, 1 və 1,5 faiz proqnozlaşdırılır.
Dünya Bankının Azərbaycanla bağlı hesabatına fikir bildirən iqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, bu məlumatla razı deyil: "Dünya Bankı hesabatı hazırlayarkən ölkə əhalisinin gəlirlərinin azalması, azalma fonunda da istehlak qabiliyyətinin zəifləməsini və inflyasiyanın aşağı düşməsini hesablayır. Nəzərə almaq lazımdır ki, 2017-ci ildə hökumət "tam üzən məzənnə" rejiminə keçidlə bağlı qərar qəbul etmək istəyir. Hələlik manat üzərində ciddi təzyiq var və real məzənnəsini tapmayıb. Növbəti müddət ərzində manatın ucuzlaşma ehtimalı kifayət qədər yüksəkdir. "Tam üzən məzənnə" rejiminə keçid halında manatın yenidən dəyər itirmə ehtimalı var. Belə şərtlər daxilində 2017-ci ildə ölkədə, ən azından, manatın dəyərsizləşməsi fonunda idxal mənşəli inflyasiya ikirəqəmli həddə çatacaq. İstehlak qabiliyyətinin aşağı səviyyədə olması müəyyən qədər bu istiqamətdə tormozlanma funksiyasını həyata keçirir. Ancaq bununla belə, 2017-ci ildə Azərbaycan vətəndaşı ikirəqəmli inflyasiyanı hiss edəcək. Bu il ikirəqəmli inflyasiya baş verəcək".
Günel CƏLİLOVA
