Azər Allahverənov: "Bu yöndə görülən işlər hökumətin diqqət mərkəzindədir"
"Azərbaycan Respublikasında logistika və ticarətin inkişafına dair Strateji Yol Xəritəsi"nin mexanizmlərindən biri də özəl sektorun logistika sahəsində xüsusi çəkisinin artırılmasıdır. Həmin "Strateji Yol Xəritəsi"ndə nəzərdə tutulan sektoral yanaşmada bu sahənin də potensial imkanlarından yararlanmaq olar.
Qabaqcıl təcrübəyə malik bəzi ölkələrdə 30 il ərzində logistika sahəsində xeyli dövlət aktivləri özəlləşdirilib. Təcrübə göstərir ki, özəl sektorun logistika sahəsində iştirakı əməliyyat gəlirləri üzrə marjanın, kommunikasiyanın şəffaflığının və açıqlığının, həmçinin xidmətlərin səviyyəsinin yüksəlməsinə səbəb olur. Bu həm də dövlət üçün daha yüksək gəlirlilik göstəricilərinin təmin olunması və bu sektorun rentabelliyinin təmin edilməsi deməkdir. Logistika üzrə özəl sektorun xüsusi çəkisinin artırılması bu sahədə rəqabət mühitini sağlamlaşdıraraq, regional və beynəlxalq turizmin inkişafı üçün də ciddi təkan ola bilər. Azərbaycanda mədəni turizm, sağlamlıq turizmi, ekoturizm, kənd turizmi kimi turizm növləri üzrə tələbatın artırılması və qış turizminin inkişafına dəstək verilməsi kimi islahatların aparılması turizmlə bağlı digər altsektorların daha da inkişaf etdirilməsi strategiyası ilə bağlıdır.
Bütövlükdə, logistika sahəsi üzrə özəl sektorun çəkisinin artırılmasına ekspertlər necə yanaşır?
Məsələyə münasibət bildirən nəqliyyat sahəsi üzrə ekspert Azər Allahverənovun sözlərinə görə, sənəddə öz əksini tapmış logistik məsələlər iqtisadi sektorun vacib sahələrindən biridir: "Ona görə ki, artıq Azərbaycanın əlverişli geostrateji məkanda yerləşməsi bu sahədə də öz dividendlərini gətirməlidir. Bunun üçün də müəyyən işlər həyata keçirilir. Burada söhbət Şərqlə Qərbi əlaqələndirən İpək Yolundan, Şimal-Cənub nəqliyyat dəhlizindən gedir. Bu baxımdan Azərbaycan çox əlverişli coğrafi məkanda yerləşir. Çünki bir çox tranzit yollar məhz buradan keçir. Təbii ki, bu infrastrukturdan da lazımi dərəcədə yararlanmaq vaxtı gəlib çatıb. Ancaq burada söhbət təkcə dəmir yollarından getmir. Həm də söhbət su vasitəsilə yüklərin daşınmasından gedir. Bu istiqamətdə də işlər gedir. Məlum olduğu kimi, Ələt qəsəbəsində böyük dəniz limanı tikilir. Şübhəsiz, bütün bunlar onu göstərir ki, bu yöndə görülən işlər hökumətin diqqət mərkəzindədir. Söhbət ildən-ilə artan yükdaşımalardan və bundan əldə olunan kapitalın ümidverici həcmdə olmasından gedir. Elə dövlətlər var ki, heç nəyi yoxdur, amma logistika hesabına çox böyük gəlir əldə edir. Özəl sektorun logistika sahəsinə cəlb olunması, hesab edirəm ki, hökumətin prioritetlərini müəyyənləşdirir. Təbii ki, buna uyğun olaraq digər işlər də həyata keçiriləcək. İstənilən halda, özəl sektorun logistika sahəsinə cəlb olunması bu sahənin səmərəli fəaliyyət göstərməsinə müsbət təsir edəcək. Ancaq bunun üçün bir sıra islahatlar aparılmalıdır".
Vidadi ORDAHALLI
