Zakir Əhmədov: "İqtisadiyyatın neftdən asılılığını azaltmaq üçün ölkədə ciddi islahatlar həyata keçirilir"
Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə Azərbaycan xalqına təbrikində qeyd edib ki, 2016-cı il ölkə iqtisadiyyatı üçün ağır illərdən biri olsa da, Azərbaycan iqtisadiyyatı öz dayanıqlılığını saxlaya bilib.
İqtisadi sabitlik təmin edilib və bu il aparılan ciddi və hərtərəfli iqtisadi islahatlar gələcək inkişafımız üçün çox gözəl üfüqlər, perspektivlər açır: "Onu da qeyd etməliyəm ki, bütün çətinliklərə baxmayaraq, ölkəmizin qeyri-neft sənayesi bu il 5 faiz, kənd təsərrüfatı isə 2 faizdən çox artmışdır. Biz bu il valyuta ehtiyatlarımızı qoruya bilmişik. Bu da çox mühüm məsələdir. Çünki bizim iqtisadi potensialımız, maliyyə resurslarımız həm iqtisadi, həm siyasi müstəqilliyimizi müəyyən edir".
Azərbaycan Prezidenti vurğulayıb ki, 2016-cı ildə bütün sosial proqramlar artıqlaması ilə icra edilib: "Köçkünlərin yaşayış şəraitinin yaxşılaşdırılması istiqamətində yeni qəsəbələr, şəhərciklər salınmışdır. Əhalinin pul gəlirləri, - baxmayaraq ki, 2016-cı il böhranlı ildir, - 7 faiz artmışdır, orta əməkhaqqı isə 9 faiz artmışdır. Bir sözlə, bütün çətinliklərə baxmayaraq, Azərbaycan 2016-cı ildə də inamla inkişaf etmişdir. Bir daha qeyd etmək istəyirəm, bu il qəbul etdiyimiz qərarlar, xüsusilə ölkə iqtisadiyyatının şaxələndirilməsi istiqamətində atılmış addımlar öz nəticəsini verəcəkdir".
Sözügedən məsələ ilə bağlı fikirlərini "Bakı-Xəbər"lə bölüşən ekspert Zakir Əhmədovun sözlərinə görə, dövlətin iqtisadi imkanları nə qədər geniş olsa, bu bir o qədər həmin ölkənin siyasi müstəqilliyini gücləndirir: "O baxımdan Prezident İlham Əliyev tamamilə realist mövqedən çıxış edərək qeyd etdi ki, iqtisadi potensialımız, maliyyə resurslarımız həm iqtisadi, həm də siyasi müstəqilliyimizi müəyyən edir. Yəni Azərbaycan sözügedən meyarlara cavab verən ölkədir. İqtisadi böhran bir sıra ölkələri faktiki olaraq sarsıdıb. Həmin ölkələrdə xarici dövlət borcunun həcmi sürətlə artır. Makroiqtisadi sabitliyə nail olmaq üçün müxtəlif beynəlxalq kredit təşkilatlarından borc alırlar. Azərbaycanda, şükürlər olsun ki, bənzər problemlər yaşanmır. Azərbaycanın yetərincə valyuta ehtiyatı var. İqtisadiyyatın neftdən asılılığını azaltmaq üçün ölkədə ciddi islahatlar həyata keçirilir. Bu da yaxın illərdə ölkə iqtisadiyyatında qeyri-neft sektorunun çəkisinin daha da artacağı deməkdir. Ona görə də Azərbaycan iqtisadi və siyasi baxımdan müstəqil siyasət yeridir". Vidadi ORDAHALLI
