Əkrəm Həsənov: "Bankların çökməsi ölkə iqtisadiyyatı üçün mənfi nəticələr verə bilər, bu səbəbdən də dövlətin bank sektoruna kömək etmək istəyi alqışlanmalıdır"
Azərbaycanda ödəmə qabiliyyətini itirmiş kommersiya banklarında aparılan restrukturizasiya və sağlamlaşdırma tədbirləri çərçivəsində müvafiq icra hakimiyyəti orqanının müəyyən etdiyi qaydada qeyri-işlək aktivlərin təqdim edilməsi 2017-ci il yanvarın 1-dən 3 il müddətinə ƏDV-dən azad edilə bilər. Bu barədə vergilər naziri Fazil Məmmədov Milli Məclisin İqtisadi siyasət, sənaye və sahibkarlıq komitəsinin ötən gün keçirilən iclasında məlumat verib.
Problemli banklara güzəşt olunması ilə bağlı fikir bildirən iqtisadçı-ekspert Ruslan Atakişiyev "Bakı-Xəbər"ə açıqlamasında qeyd etdi ki, cari il ərzində bank sektorunun sağlamlaşdırılması istiqamətində bir sıra tədbirlər həyata keçirilib: "Bankların birləşdirilməsi, problemli kredit aktivlərinin başqa kommersiya banklarına ötürülməsi kimi işlər görülüb. Bu kimi işlər bank sektorunun mövcud durumunun müəyyən qədər yaxşılaşdırılmasına yönələn işlərdir. Bəllidir ki, devalvasiya proseslərindən ən çox zərər elə bank sektoruna və onlardan kredit götürən əhaliyə dəydi. Yaşanan ağır durum kredit ödəmək məcburiyyətində qalanları çətin vəziyyətə qoyub. Problemli banklara güzəşt olunması da müəyyən bir addımdır".
Həmsöhbətimiz təklif edir ki, bank sektorunun sağlamlaşdırılması istiqamətində görülən işlərlə yanaşı, məzənnə ilə bağlı problemlərin həlli yönündə birbaşa işlər görülsün.
Bank sahəsi üzrə ekspert Əkrəm Həsənov bizimlə söhbətində qeyd etdi ki, bank sektorunun vəziyyətinin ağır olması danılmazdır: "Bankların çökməsi ölkə iqtisadiyyatı üçün mənfi nəticələr verə bilər. Dövlətin bank sektoruna kömək etmək istəyi alqışlanmalıdır. Zənnimcə, tək bank sektoruna deyil, digər sahələrə də dəstək olmaq lazımdır".
Həmsöhbətimiz onu da əlavə etdi ki, banklar problemli kreditlər üzrə əhaliyə güzəşt etmir: "Dövlət banklara güzəşt edirsə, bankların qarşısında müəyyən şərtlər qoymalıdır ki, onlar da müştərilərinə eyni qaydada yanaşsın. Belə olmazsa, sosial gərginlik artar".
Günel CƏLİLOVA
