Çingiz Fərəcov: "Quşçuluq təsərrüfatının əlavə dəyər vergisindən azad olunmasını alqışlayıram"
Azərbaycanda 2017-ci il yanvarın 1-dən quş ətinin satışı, eləcə də un və çörəyin istehsalı və satışının 3 il müddətinə əlavə dəyər vergisindən (ƏDV) azad edilməsi planlaşdırılır.
Bunu vergilər naziri Fazil Məmmədov Milli Məclisin İqtisadi məsələlər, sənaye və sahibkarlıq komitəsinin iclasında deyib. Nazir bildirib ki, ölkədə quş əti, un və çörəyin istehsalının ƏDV-dən azad olunması ölkədə bu ərzaqların istehsalını daha da stimullaşdıracaq.
Quş əti, eləcə də un məmulatlarının satışı və istehsalının ƏDV-dən azad olunması fikri ekspertlər tərəfindən müsbət dəyərləndirilir.
Aqrar sahə üzrə ekspert Çingiz Fərəcov "Bakı-Xəbər"ə açıqlamasında qeyd etdi ki, dünyanın bütün ölkələrində quşçuluq sahəsi inkişaf edir. Çünki bu sahəyə daha çox tələbat və ehtiyac var.
Ekspertin sözlərinə görə, son illər quşçuluqda bütün məhsullar xaricdən gətirilir: "Qum yemlərinin 70 faizi, soya, texnoloji avadanlıqların, demək olar ki, hamısı xarici ölkələrdən gətirilir. 1 ton soyanın qiyməti 600-700 dollar civarındadır. Bu səbəbdən də quşçuluq sahəsi ziyanla işləyir. Bəllidir ki, bir çox quşçuluq fabrikləri, o cümlədən, Dəvəçi, Siyəzən broyler və digərləri istehsalı dayandırıb. Yüzlərlə işçi ixtisar olunub. Quş əti məhsulunun 1 kiloqramı baha başa gəlir. Xarici ölkələrdə 1 kq quş əti 50-60 qəpiyə başa gəlirsə, bizdə isə 1 manat 40 qəpikdir. Bu məbləğin üzərinə işıq, nəqliyyat, xarici ölkələrdən yem gətirmək xərcini də əlavə etsək, məbləğ daha da yüksəlir. Bu səbəbdən quşçuluq fabrikləri sıradan çıxır. Ona görə də quşçuluq təsərrüfatının əlavə dəyər vergisindən azad olunmasını alqışlayıram. Nəqliyyat xərclərində 50 faiz güzəşt olunsa, bu sahədə irəliləyiş əldə olunar".
Həmsöhbətimiz onu da əlavə etdi ki, çörək məhsullarının da vergidən azad olunması təqdirəlayiq haldır: "İnsanların ən böyük ehtiyacı çörəyədir. Un məmulatlarının satışı və istehsalının ƏDV-dən azad olunması bu sahənin inkişafına təkan verəcək. Çörəyin ƏDV-dən azad olunması onun qiymətinə də təsir edər".
Günel CƏLİLOVA
