Rəsul Cahangirli: "Prinsipcə, FAO rəsmisinin səsləndirdiyi fikirlər reallığı əks etdirir"
BMT-nin Ərzaq və Kənd Təsərrüfatı Təşkilatının (FAO) baş direktorunun müavini və Avropa və Mərkəzi Asiya üzrə regional nümayəndəsi Vladimir Raxmanin mətbuata açıqlamasında Azərbaycanla bağlı bir sıra məqamlara toxunub. Baş direktorun müavini deyib ki, Azərbaycan ərzaq təhlükəsizliyinin təmin olunduğu bir ölkədir və ölkənin növbəti hədəfi kənd təsərrüfatını daha dayanıqlı və rəqabətqabiliyyətli etməkdən ibarətdir.
Onun sözlərinə görə, FAO və Azərbaycan arasında əməkdaşlıq heyvanların və bitkilərin sağlam olması, kənd təsərrüfatına investisiyaların dəstəklənməsi, potensialın inkişaf etdirilməsi, siyasi və institusional əsasların möhkəmləndirilməsi, məhsuldarlığın, balıqçılıq təsərrüfatı və heyvandarlığın göstəricilərinin artırılması, davamlı, səmərəli meşə təsərrüfatı, torpaq və su resurslarının idarə olunması kimi prioritet sahələri müəyyən edən "2016-2020-ci illər üçün ölkə proqramı" çərçivəsində formalaşdırılır: "FAO və Azərbaycan məhz bu sahələrdə birgə təşəbbüslər planlaşdırır".
Təşkilatın nümayəndəsi onu da bildirib ki, hər bir insan istehlaka daha məsuliyyətli yanaşmaqla və gündəlik sadə qərarları dəyişməklə, məsələn, daha az qida tullamaqla və ya daha az ət və daha çox paxlalı bitki istifadə etməklə qida tullantılarının həcminin azalmasına və iqlim dəyişikliyinin nəticələrinin yumşalmasına öz töhfəsini verə bilər.
Maraqlıdır, ekspertlər FAO rəsmisinin Azərbaycanı ərzaq təhlükəsizliyinin təmin olunduğu bir ölkə kimi xarakterizə etməsini necə şərh edir?
Məsələyə münasibət bildirən ekspert Rəsul Cahangirlinin fikrincə, prinsipcə, deyilənlər reallığı əks etdirir: "Ona görə ki, son illər dünya iqtisadiyyatında yaşanan böhranla əlaqədar olaraq Azərbaycanın ərzaq təchizatında hər hansı problem yaşanmayıb. Bir sıra ərzaq məhsulları var ki, bunlara tələbat yerli istehsal hesabına təmin edilir. Elə ərzaq məhsulları var ki, onların yarıdan çoxu daxili potensial hesabına təmin edilir. Bundan başqa, neçə illərdir ölkədə Taxıl Fondu fəaliyyət göstərir. Belə ki, həmin Fondun hesabına taxıl məhsulları tədarük edilir. Bununla yanaşı, son dövrlər Azərbaycanda kənd təsərrüfatının inkişaf etdirilməsi istiqamətində ciddi işlər həyata keçirilir. Məqsəd ölkə əhalisinin ərzaq məhsullarına tələbatını tamamilə yerli istehsal hesabına təmin etməkdir. Eyni zamanda, bir sıra kənd təsərrüfatı məhsullarının ixracı da mühüm vəzifə olaraq qarşıya qoyulur". Vidadi ORDAHALLI
