Rəşad Həsənov: "Minimum əməkhaqqının məbləği orta aylıq əməkhaqqının 60 faizinə çatarsa, insan kapitalının inkişafında ciddi nailiyyət hesab olunar"
Azərbaycanda minimum əməkhaqqı orta əməkhaqqı səviyyəsinin 60 faizinə yaxınlaşacaq. Bu barədə Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasının milli iqtisadiyyat perspektivi üzrə Strateji Yol Xəritəsi"ndə deyilir.
Qeyd olunur ki, 2025-ci ildən sonrakı dövrdə yoxsulluq ünvanlı şəkildə tam aradan qaldırılacaq, keyfiyyətli səhiyyə xidmətlərinə və təhsilə çıxış imkanları genişləndiriləcək. Ötən on il ərzində keçilmiş yolu davam edərək, dövlət iqtisadi inkişafın ən yoxsul insanları əhatə etməsini və beləliklə də ünvanlı olaraq yoxsulluğun aradan qaldırılmasını təmin edəcək.
Sənəddə bildirilir ki, 2025-ci ildən sonrakı dövrdə yoxsulluq probleminin həllinə iki yanaşma olacaq: layiqli iş yerlərinin sayının artırılması; əməkhaqqı və digər gəlirləri ilə zəruri ehtiyaclarını ödəyə bilməyən insanlara ünvanlı sosial dəstək.
Minimum əməkhaqqı məbləğində tədrici artım işləyən yoxsul insanların xüsusi çəkisini minimuma endirəcək.
İqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, belə bir öhdəlik "Azərbaycan - 2020: Gələcəyə baxış" adlı konsepsiyada da əks olunub: "Həmin konsepsiyada da nəzərdə tutulub ki, Azərbaycanda orta aylıq əməkhaqqının minimum həddi orta aylıq əməkhaqqının 60 faizinə qaldırılacaq. Bu təcrübə Avropadan götürülüb. Çox təəssüflə qeyd etmək lazımdır ki, 2012-ci ildə konsepsiya qəbul olunan zaman orta aylıq əməkhaqqının tərkibində minimum əməkhaqqı 23.5 faiz idi. 2015-ci ildə isə 1 faizlik azalma baş verdi. Hazırda bu öhdəliyin yerinə yetirilməsi bir çox meyarların daha keyfiyyətli şəkildə qiymətləndirilməsinə, müəyyənləşdirilməsinə şərait yaradacaq. Minimum əməkhaqqı müxtəlif məsələlərdə yoxsulluğun qiymətləndirilməsində istifadə olunan indiqatorlardandır. Göstəricinin aşağı səviyyədə olması əhalinin gəlirləri, yoxsulların sayının qiymətləndirilməsi və düzgün müəyyənləşdirilməsi baxımından bir sıra problemlər yaradırdı. Həmçinin, ölkədə ünvanlı sosial yardımın həcmi ilə bağlı məsələlərdə müəyyən çətinliklər yaşanırdı. Minimum əməkhaqqının həcmi artarsa, yaşanan çətinliklər aradaq qaldırılacaq. 9 il uzun müddətdir. Qeyd olunan öhdəlik bu müddət ərzində icra olunmalıdır. Minimum əməkhaqqının məbləği orta aylıq əməkhaqqının 60 faizinə çatarsa, insan kapitalının inkişafında ciddi nailiyyət hesab olunar".
Günel CƏLİLOVA
