Ramin Rəhimov: "Manatın məzənnəsi valyuta hərracının nəticəsindən birbaşa asılı olacaq"
Biz bu ilin əvvəlindən artıq "üzən məzənnə" rejimində çalışırıq. Bunu təsdiq edən fakt odur ki, artıq Mərkəzi Bank fevral ayından bazarda öz valyutasını satmır. Bunu Azərbaycan Mərkəzi Bankının İdarə Heyətinin (AMB) sədri Elman Rüstəmov bildirib.
O qeyd edib ki, bu gün bazarda tələb təklifi üstələyir: "Buna görə "tam üzən məzənnə"yə keçid ciddi hazırlıq tələb edir. Biz bu plana uyğun olaraq işləyirik. Bizim əsas məqsədimiz makroiqtisadi sabitliyə nail olmaqdır".
Bu açıqlama ilə AMB sədri "tam üzən məzənnə"yə keçidi təsdiq etdi. Digər tərəfdən, "Milli iqtisadiyyat perspektivi üzrə Strateji Yol Xəritəsi"ndə qeyd edilib ki, "tam üzən məzənnə" rejiminə keçid həyata keçirilməlidir və bu baxımdan, ilk növbədə, yaxın və ortamüddətli dövrdə məzənnə siyasətinin əsas strateji hədəfi kimi idxalın əvəzlənməsi siyasətinin dəstəklənməsi prioritet seçilə bilər.
Sənəddə qeyd edilib ki, qlobal əmtəə bazarlarında neftin qiymətinin kəskin aşağı düşməsinin Azərbaycanın xarici və daxili iqtisadi balansına neqativ təsirlərini minimuma endirmək, ölkə iqtisadiyyatının beynəlxalq rəqabət qabiliyyətini yüksəltmək, həmçinin ölkənin malik olduğu xarici valyuta ehtiyatlarının bütövlüyünü təmin etmək məqsədilə AMB İdarə Heyətinin 2015-ci il 21 dekabr tarixli qərarı ilə sabit məzənnə rejimindən imtina edilib, "üzən-tənzimlənən məzənnə" rejiminin tətbiqinə başlanıb.
Maraqlıdır, ekspertlər "tam üzən məzənnə"yə keçməyi necə dəyərləndirir? Məsələyə münasibət bildirən iqtisadçı-ekspert Ramin Rəhimovun sözlərinə görə, indiyə qədər Mərkəzi Bank müəyyən hallarda bazara dollar çıxarırdı, hərraclarda iştirak edirdi: "Bundan əlavə, bəzi hallarda, hərracın nəticəsindən asılı olmayaraq, məzənnəyə müdaxilə edirdi. "Tam üzən məzənnə"yə keçid nəticəsində artıq bu proses dayanacaq. AMB-nin ehtiyatları 4 milyard dollara qədər azaldığından, psixoloji həddi keçməmək üçün valyuta hərraclarına dollar çıxarmağı dayandıracaq. Eyni zamanda, bankların dollar satışına qoyulan +-4% spred aradan qaldırılacaq. Banklar AMB-nin məzənnəsinə uyğun olaraq valyutadəyişmə əməliyyatlarını həyata keçirəcək. Keçidin ilkin mərhələsində ola bilsin ki, bankların 4 faizlik marja ilə dollar satışı davam etsin. Bu da yarana biləcək manipulyasiyanın qarşısını almaq məqsədinə xidmət edir. Ümumilikdə, bütün bu sadalananlar o deməkdir ki, manatın məzənnəsi valyuta hərracının nəticəsindən birbaşa asılı olacaq. Yəni valyuta hərracının sonunda müəyyən olunan kurs qüvvədə olacaq və Mərkəzi Bank məhz həmin kursa hər hansı dəyişiklik etməyəcək. AMB hərraca dollar çıxarılışını dayandırsa da, Neft Fondu bazara dollar çıxarmaqda davam edəcək".
Vidadi ORDAHALLI
