Vahid Əhmədov: "Mərkəzin yaradılmasından sonra çoxlu sayda insan əmək fəaliyyəti ilə məşğul olacaq"
Azərbaycanda işədüzəltmə mərkəzi təsis edilə bilər. Bu barədə Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasının milli iqtisadiyyat perspektivi üzrə Strateji Yol Xəritəsi"ndə deyilir.
Qeyd olunur ki, Azərbaycanda artıq icrasına başlanan layihələr davam etdiriləcək, o cümlədən əmək məhsuldarlığı sahəsindəki fəaliyyətlərin nəticələrini izləmək üçün monitorinqlər keçiriləcək. Fəaliyyət prinsiplərini əsas tutaraq, ölkənin gələcək inkişafı yeni təkmilləşdirmə planları əsasında qurulacaq. Əmək məhsuldarlığının artırılması istiqamətində fəaliyyət planının hazırlanması və icrası prosesində effektiv beynəlxalq təcrübələrdən istifadə olunması zəruridir. Fəaliyyət göstərən istehsal müəssisələrində insan resursları üzrə bacarıqların təkmilləşdirilməsi və inkişaf etdirilməsi, klasterli inkişaf üçün işçi qüvvəsinin hazırlanması və təkrar hazırlanması prosesi davam etdiriləcək, işə qəbul və təlim mexanizmini təkmilləşdirmək üçün müxtəlif stimullaşdırıcı və təşviqedici tədbirlər həyata keçiriləcək.
Kommersiya təşkilatlarında işə qəbul prosesinin asanlaşdırılması və çevik mexanizmin qurulması üçün dövlət tərəfindən yerli işədüzəltmə mərkəzinin təsis edilməsi nəzərdən keçiriləcək. Müxtəlif sektorlarda əmək bazarının tələblərinə cavab verən perspektivli işçilərin hazırlanması məqsədilə mərkəz tərəfindən həyata keçirilən təlimlər tam olaraq dövlət tərəfindən maliyyələşdirilə bilər.
Milli Məclisin İqtisadi siyasət və sosial komitəsinin üzvü, millət vəkili Vahid Əhmədov "Bakı-Xəbər"ə açıqlamasında qeyd etdi ki, Əmək və Əhalinin Sosial Müdafiəsi Nazirliyinin tərkibində Məşğulluq Mərkəzi fəaliyyət göstərir. Həmin mərkəz mütəmadi olaraq əmək yarmarkaları keçirir, insanları işlə təmin edir, müəyyən işlər görür: "İnsanların işlə təmin olunması məsələsi çox vacibdir. Hətta ölkə başçısı İlham Əliyev tərəfindən təsdiq olunan "Milli iqtisadiyyat perspektivi üzrə Strateji Yol Xəritəsi"ndə də bu məsələyə xüsusi yer ayrılıb. İşədüzəltmə mərkəzlərinin yaradılmasında məqsəd insanları öz peşəsinə uyğun işlə təmin etməkdir. Mərkəzin yaradılmasından sonra çoxlu sayda insan əmək fəaliyyəti ilə məşğul olacaq. Əlbəttə, işlə təmin olunmaq insanlar üçün önəmlidir. Belə bir mərkəzin yaradılması ölkə iqtisadiyyatına müsbət təsir edə bilər".
Günel CƏLİLOVA
