Rəsul Cahangirli: "Bütün bunların nəticəsində neftdən asılılıq əhəmiyyətli şəkildə azalacaq"
Prezidentin ictimai-siyasi məsələlər üzrə köməkçisi Əli Həsənov "Əl-Cəzirə" telekanalına müsahibəsində postneft dövründə Azərbaycan üçün 3 sektorun inkişaf etdirilməsinin prioritet olduğunu bildirib: "Prezident İlham Əliyev çıxışlarının birində deyib ki, neft dövrü artıq bitib və Azərbaycanın inkişafı qeyri-neft iqtisadiyyatının inkişafı ilə bilavasitə bağlıdır.
Neft-qaz gəlirlərinin azalması, başqa dövlətlər kimi, Azərbaycan iqtisadiyyatına da təsir edib. Təbii ki, hökumət qənaət rejiminə keçib, ikinci planda olan bir sıra layihələrin icrası dayandırılıb. Bununla yanaşı, ölkəmiz üçün strateji əhəmiyyət kəsb edən məsələlərin həlli davam etdirilir, əhalinin sosial təminatında hər hansı problem yaranmayıb.
Yeni şəraitdə Prezident İlham Əliyev dərin iqtisadi islahatların həyata keçirilməsini elan etdi, gəlirlərin neft-qazdan asılılığının tədricən azalmasına əsaslanan yeni iqtisadi siyasətin reallaşdırılmasına başlandı. Beləliklə, Azərbaycan üçün 3 sektorun inkişaf etdirilməsi prioritetdir: beynəlxalq nəqliyyat-tranzit şəbəkəsinin formalaşdırılması; torpaqların səmərəli istifadəsi, kənd təsərrüfatının inkişaf etdirilməsi və bu sahədə ixrac potensialının yüksəldilməsi; turizm sektorunun inkişafı".
O da məlumdur ki, son 10 ildə Azərbaycan dünyada iqtisadi artım tempinə görə ön sıralarda qərar tutub. Uğurla həyata keçirilən neft strategiyası əsasında əldə olunmuş gəlirlər hesabına infrastruktur modernləşdirilib, qeyri-neft iqtisadiyyatı inkişaf etdirilib, sosial rifah yaxşılaşdırılıb, dövlətin balansında olan aktivlər artıb və ÜDM-in həcmini aşan səviyyədə strateji valyuta ehtiyatları yaradılıb. Ancaq 2014-cü ildən başlayaraq neft qiymətlərinin kəskin azalması, bütün ölkələrdə olduğu kimi, Azərbaycanın da iqtisadiyyatına təsir edib. O üzdən, postneft iqtisadiyyatının inkişafı baxımından tranzit, kənd təsərrüfatı və turizm sektorlarının perspektivlərini ekspertlər necə dəyərləndirir? Məsələyə münasibət bildirən ekspert Rəsul Cahangirlinin sözlərinə görə, sadalanan hər üç istiqamətdə artıq ciddi iş gedir: "Məsələ ondadır ki, Azərbaycan regionda mühüm tranzit əhəmiyyətə malikdir. Orta Asiya ölkələri ilə Avropa arasında ticarət əlaqələrinin genişləndirilməsində tranzit ölkə olaraq Azərbaycanın əhəmiyyəti daha böyükdür. Gələn il Bakı-Tiflis-Qars dəmir yolunun istismara verilməsi bu baxımdan ciddi dönüş yarada bilər. Həmçinin, uzaq Çin də bu xətdən istifadə edəcək ki, bu da tranzit ölkə olaraq Azərbaycanın gəlirlərini artıracaq. Bununla yanaşı, "Şimal-Cənub" nəqliyyat dəhlizinin reallaşdırılması istiqamətində ciddi iş gedir. Burada söhbət Rusiya-İran dəmir yolu şəbəkəsinin birləşdirilməsindən gedir ki, bunun mühüm əhəmiyyəti var. Eyni zamanda, Azərbaycanın çox zəngin kənd təsərrüfatı potensialı var. Hesab edirəm ki, kənd təsərrüfatında məhsul istehsalının təkcə yerli tələbatı ödəmək üçün deyil, o cümlədən ixrac məqsədilə səmərəli təşkil edilməsi müsbət nəticə verəcək. Azərbaycanda istehsal olunan kənd təsərrüfatı məhsullarının keyfiyyətinə görə xaricə daha yüksək qiymətə ixrac edilmək potensialı var. Ən nəhayət, turizm sektorunun inkişaf etdirilməsi bu sahədə əldə olunan gəlirlərin artmasına ciddi təkan verəcək. Bütün bunların nəticəsində neftdən asılılıq əhəmiyyətli şəkildə azalacaq".
Vidadi ORDAHALLI
