Ruslan Atakişiyev: "Bankların xarici borcu və bu borcun xarici valyuta ilə olması da mövcud vəziyyətə təsir göstərir"
"Fitch" beynəlxalq reytinq agentliyi 2017-ci ilə üzrə MDB və Gürcüstanın bank sektorlarına dair proqnozlarını açıqlayıb.
Hazırda reytinq agentliyinin Rusiya, Ermənistan və Ukraynanın bank sektorları üzrə proqnozu stabildir. Bununla yanaşı, "Fitch"in Qazaxıstan, Azərbaycan və Belarusun bank sektorları üzrə proqnozu neqativdir: "Bu ölkələrin milli valyutaları kəskin devalvasiya ilə üzləşib. Adıçəkilən ölkələrdə xarici valyuta ilə kreditləşmə olduqca yüksək səviyyədədir. Tənzimləyicilər bankların aktivlərini yenidən qiymətləndirməli və bankların kapitallaşmasına nail olmalıdır".
Gürcüstan və Özbəkistanın bank sektorları üzrə reytinq stabildir.
Rusiyanın bank sektoru üzrə proqnoz rublun məzənnəsinin və ölkə iqtisadiyyatının stabilləşməsinə əsaslanıb.
Agentliyin mütəxəssisləri qeyd edir ki, Azərbaycan banklarının kapitalına və likvidliyinə təzyiq mövcuddur. Buna səbəb aktivlərin keyfiyyətinin pisləşməsidir: "Ciddi kapital defisiti və zərərləri nəzərə alaraq Azərbaycan banklarının maliyyə çətinliyi ilə üzləşəcəyini proqnozlaşdırırıq. Yaranmış vəziyyətdə sektorda "təmizləmə"nin davam edəcəyini düşünürük".
Maraqlıdır, ekspertlər bunu necə dəyərləndirir?
Sözügedən məsələ ilə bağlı fikirlərini "Bakı-Xəbər"lə bölüşən İqtisadi Resursların Öyrənilməsi Mərkəzinin sədri Ruslan Atakişiyev bunu istisna etmədi: "Nəzərə almaq lazımdır ki, bank sektorunda ümumi olaraq maliyyə çətinliyi var. Bütün bu çətinliklər də banklara təsirsiz ötüşmür. Nəzərə almaq lazımdır ki, bu il 10-a yaxın bank bazardan çıxıb. Bankların xarici borcu və bu borcun xarici valyuta ilə olması da mövcud vəziyyətə təsir göstərir. Faktiki olaraq bu, həmin bankların ödəmə qabiliyyətində çətinliklər törədir. Ona görə də hesab edirəm ki, gələn il də bank sektorunda müəyyən islahatların aparılmasının şahidi olacağıq. Bu da o anlama gəlir ki, gələn il də bankların sayı azalacaq".
Vidadi ORDAHALLI
