Vahid Əhmədov: "Hesab edirəm ki, indiki məqamda Azərbaycanda pensiyaya görə yaş həddinin artırılmasına ehtiyac yoxdur"
Məlum olduğu kimi, Azərbaycanda bütün peşə sahələri üzrə əmək pensiyasına görə yaş həddinin artırılması təklif olunur. Bununla bağlı "Əmək pensiyaları haqqında" Qanuna əlavə və dəyişikliklər layihəsi hazırlanıb. Layihəyə əsasən, bütün peşələr üzrə pensiyaya çıxmaq üçün tələb olunan iş stajı artırılır.
Dövlət qulluqçuları üçün hazırda qüvvədə olan 15 təqvim ilinin 20 ilə, hərbi qulluqçular üçün hazırda qüvvədə olan 20 təqvim ilinin 25 ilə, prokurorlar üçün 25 təqvim ilinin 35 ilə, o cümlədən digər peşələr üçün də tələb olunan staj ilinin müvafiq olaraq 5 il qaldırılması layihədə əksini tapıb.
Layihədə, ümumilikdə, pensiya yaşının artırılaraq əmək pensiyaları üçün tələb olunan yaş hədləri ilə differensiallaşdırılması da əks olunub.
Layihənin ilin sonuna kimi Milli Məclisdə müzakirəyə çıxarılması nəzərdə tutulub.
Sözügedən məsələ ilə bağlı mətbuata açıqlama verən Milli Məclisin Əmək və sosial siyasət komitəsinin sədri Hadı Rəcəblinin sözlərinə görə, bu ideyanın məğzi heç də pensiya sisteminin qəlizləşdirilməsi demək deyil: "Əksinə, təkmilləşdirilməsi ola bilər və burada reallıqlara, dünya təcrübəsinə istinad edilib. Burada söhbət nədən gedə bilər? Məsələn, dövlət qulluğunda pensiya almaq üçün iş stajının 5 və ya 10 il artırılması o deməkdir ki, artıq pensiyaya çıxan məmurun məsuliyyəti daha çox artırılacaq. Məsuliyyəti artdıqca, imtiyazı da artacaq. Bu tək dövlət qulluğuna yox, bütün digər işləyənlərə də aiddir".
Maraqlıdır, ekspertlər bütün peşə sahələri üzrə əmək pensiyasına görə yaş həddinin artırılması təklifinə necə baxır?
Məsələyə münasibət bildirən Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədovun sözlərinə görə, indiki məqamda pensiyaya görə orta yaş həddinin artırılmasına ehtiyac yoxdur: "Pensiyaya görə orta yaş həddinin artırılması hələlik müzakirə obyekti deyil. Doğrudur, bəzi ekspertlərin, müəyyən xarici təşkilatların Əmək və Əhalinin Sosial Müdafiəsi Nazirliyi ilə əlaqələri var. Onlar zamanla bu məsələni qaldırır. Amma mən hesab edirəm ki, indiki məqamda Azərbaycanda pensiyaya görə yaş həddinin artırılmasına ehtiyac yoxdur. Yaş necədirsə, o səviyyədə saxlanmalıdır. Hökumət tərəfindən belə bir müzakirə aparılmır. Ona görə də pensiya alanlar üçün orta yaş həddinin artırılacağını düşünmürəm".
Vidadi ORDAHALLI
