Çingiz Fərəcov: "Bunun üçün sahibkarlar arasında geniş təbliğat işi aparılmalıdır"
Son dövrlər sarımsağın qiymətində bahalaşma müşahidə olunur. Belə ki, bu məhsulun kilosu 10 manata satılır və ya bir baş sarımsağı 60 qəpikdən ucuz almaq olmur. Sahələrdən yığılan sarımsaq əsasən Rusiyaya ixrac olunur. Bazarlarda satılan sarımsaq əsasən Çin və Türkiyədən gətiriləndir.
Malın qıtlığı, o biri yandan dolların məzənnəsinin qalxması qiymətlərə ciddi təsir göstərib. İndi pərakəndə satışda sarımsağın kilosu 9 manatdan aşağı deyil. Halbuki, 3 il əvvəl qiymət bundan 3 dəfə ucuz idi.
Dövlət Statistika Komitəsinin məlumatına görə, ötən il Azərbaycanda 20 min 800 tona yaxın sarımsaq yığılıb. Bunun cəmi 7 min 770 kiloqramı Rusiyaya göndərilib. Dövlət Gömrük Komitəsinin hesabatına görə, 2012-ci ildən bəri kənd təsərrüfatı məhsullarının ixracatında ən yüksək göstərici - 112.8 ton bu ilin 9 ayında qeydə alınıb. Məhsul Rusiyaya may-iyun aylarında yola salınıb.
Mütəxəssislərin fikrincə, düzgün aqrotexniki qulluq göstərilərsə, bir hektar əkin sahəsi 10-15 ton sarımsaq verər. Sarımsaqdan gələn gəlir heç bir texniki və dənli bitki ilə müqayisəyə gəlməz. Məsələn, hesablamalara görə, hektardan ən azı 10 ton sarımsaq götürülsə, bu, kiloqramı 5 manatdan 50 min gəlir deməkdir. Xərci çıxandan sonra sarımsaqdan fermerə qalan qazanc 40 min manat edir. Nəzərə alaq ki, Rusiyada sarımsağın adambaşına istehlakı Azərbaycandan qat-qat çoxdur və orada buna tələbat var. Sözügedən məsələni dəyərləndirən kənd təsərrüfatı sahəsi üzrə mütəxəssis Çingiz Fərəcovun fikrincə, ölkədə bu sahəyə diqqət o qədər də yüksək səviyyədə deyil: "Ayrı-ayrı iş adamları, fermer təsərrüfatları sarımsaq istehsalı ilə məşğul olmur. Kənd Təsərrüfatı və İqtisadiyyat nazirliklərinin əməkdaşları yerlərdə bu sahəyə diqqəti daha da artırmalıdır. Bunun üçün həm də sahibkarlar arasında geniş təbliğat işi aparılmalıdır. Hesab edirəm ki, tələbat xeyli artdığına görə 2017-ci ildə bu sahəyə xüsusi diqqət ayrılacaq. Sarımsaq əkini hər il oktyabrın 20-25-də aparılır. Bəzən əkin noyabr ayının 10-a kimi də davam edir. Məhsul isə iyun ayının əvvəllərində yığılır. Bazarda yerli sarımsaq bol olsa, qiymətlər bu qədər baha olmaz. Həm də satışda yerli məhsul olsa, niyə İran və Çindən ölkəyə sarımsaq gətirilsin ki? Respublikada sarımsaqdan geniş istifadə edilir. Xüsusilə Qazax-Tovuz bölgələrinə xas olan yeməkləri sarımsaqsız təsəvvür etmək mümkün deyil. Bildiyiniz kimi, sarımsağın həm də orqanizmə böyük faydası var. Ona görə də sarımsağa tələbat böyükdür. Azərbycanda yetişdirilən sarımsaq daha keyfiyyətlidir. Əvvəllər İsmayıllı rayonunun İvanovka kəndi 2 min tona yaxın sarımsaq istehsal edə bilirdi. Lakin keçən il həddindən artıq quraqlıq olması məhsuldarlığın inkişafına imkan vermədi".
Vidadi ORDAHALLI
