Çingiz Fərəcov: "Amerikaya məhsul göndərəcəyiksə, onun yaxşı mənada seçilməsi üçün çeşidlənməsinə fikir vermək lazımdır"
Xəbər verildiyi kimi, Azərbaycanın kənd təsərrüfatı nazirinin müavini Seyfəddin Talıbov ABŞ Ticarət Nazirliyinin Avropa, Orta Şərq və Afrika üzrə müşavirinin müavini Maykl Lallinin rəhbərlik etdiyi nümayəndə heyəti ilə görüşüb.
M.Lalli çıxışı zamanı bildirib ki, Azərbaycan öz kənd təsərrüfatı məhsullarını ABŞ bazarına çıxarmaq üçün kifayət qədər potensiala malikdir: "Bu tədbirlər Azərbaycana yeni investisiya gətirə bilər. Biz özümüz də şahidi oluruq ki, amerikalı biznesmenlərin Azərbaycana marağı artmaqdadır.
İki ölkənin 25 illik iqtisadi əməkdaşlığı genişlənməkdədir. Azərbaycandakı Amerika Ticarət Palatası iki ölkə arasında ticarət əlaqələrinin inkişafı üçün 16 tövsiyədən ibarət sənəd hazırlayıb".
Azərbaycan kənd təsərrüfatı məhsullarının ABŞ bazarına çıxarılması məsələsi ekspertlər tərəfindən müsbət dəyərləndirilir.
Aqrar sahə üzrə ekspert Çingiz Fərəcov "Bakı-Xəbər"ə açıqlamasında qeyd etdi ki, Azərbaycan məhsullarının xarici bazara çıxarılması iqtisadi baxımdan əhəmiyyətli məsələdir: "Azərbaycandan Amerikaya tərəvəz məhsulları göndərmək olar. Məsələn, xiyar, pomidor, nar, qarpız və yemişi göndərə bilər. Ancaq onu da unutmaq lazım deyil ki, Azərbaycan Amerikadan çox uzaqda yerləşir. Bizim ölkədən Amerika bazarına hansısa məhsul göndərilsə, nəqliyyat xərcləri yüksək olar. Nəqliyyat xərcləri çox olduğuna görə Amerikaya kənd təsərrüfatı məhsullarının göndərilməsi o qədər də məqsədəuyğun hesab olunmur".
Həmsöhbətimiz onu da əlavə etdi ki, Amerikaya göndərilən kənd təsərrüfatı məhsulu yaxşı çeşidlənməlidir: "Bəllidir ki, bu gün istənilən ölkə Amerika bazarına məhsul göndərir. Biz Amerikaya məhsul göndərəcəyiksə, onun yaxşı mənada seçilməsi üçün çeşidlənməsi şərtdir. Həmçinin, göndəriləcək məhsula azot vurmaq olmaz, qablaşdırılmaya fikir vermək lazımdır. Unutmaq lazım deyil ki, məhsulun görünüşü onun satışının 70 faizini təmin edir".
Ekspertin fikrincə, ölkənin daxili tələbatı tam ödənildikdən sonra xarici bazara aqrar məhsul göndərilə bilər.
Günel CƏLİLOVA
