Pərviz Heydərov: "Bu isə maliyyə və bank sektorunun normal fəaliyyəti üçün mühüm şərtdir"
Prezident İlham Əliyev "Kredit büroları haqqında" 2016-cı il 28 oktyabr tarixli Qanunun tətbiqi barədə Fərman imzalayıb.
Fərmana əsasən, Nazirlər Kabinetinə tapşırılıb ki, Azərbaycan Respublikası qanunlarının və Azərbaycan Respublikası Prezidentinin aktlarının "Kredit büroları haqqında" Azərbaycan Respublikasının Qanununa uyğunlaşdırılması ilə bağlı təkliflərini; həmin qanunun pozulmasına görə məsuliyyət müəyyən edən qanun layihəsini üç ay müddətində hazırlayıb Azərbaycan Respublikasının Prezidentinə təqdim etsin; həmin qanunun 17.5-ci maddəsinin ikinci cümləsinə uyğun olaraq, müvafiq məlumatların "Elektron hökumət" portalında yerləşdirilməsi, yenilənməsi və kredit büroları tərəfindən əldə edilməsi qaydasını üç ay müddətində müəyyən edib; Azərbaycan Respublikası Nazirlər Kabinetinin normativ-hüquqi aktlarının həmin qanuna uyğunlaşdırılmasını üç ay müddətində təmin edib Azərbaycan Respublikasının Prezidentinə məlumat versin; mərkəzi icra hakimiyyəti orqanlarının normativ-hüquqi aktlarının həmin qanuna uyğunlaşdırılmasını nəzarətdə saxlasın və bunun icrası barədə beş ay müddətində Azərbaycan Respublikasının Prezidentinə məlumat versin; həmin qanundan irəli gələn digər məsələləri həll etsin.
Ümumən "Kredit büroları haqqında" Qanunun tətbiqi barədə Fərmanı ekspertlər necə dəyərləndirir? İqtisadçı-ekspert Pərviz Heydərovun fikrincə, kredit bürolarının olması sağlam maliyyə sektoru və bank sisteminin vacib şərtlərindən birini təşkil edir: "Kredit büroları borcverənlərlə borcalanlar arasında düzgün əlaqənin yaranmasına və həyata keçirilməsinə, bu sahədə tələb olunan müvafiq tənzimləməyə nail olmağa imkan verəcək. Bu isə maliyyə və bank sektorunun normal fəaliyyəti üçün mühüm şərtdir. Mən, hələ 4-5 il öncə, ölkəmizdə kredit vəsaitlərinin necə gəldi, yəni kortəbii şəkildə paylandığını bildirmişdim. Yəni bu haqda şərhlərimdə yazırdım, dönə-dönə qeyd edirdim. Çoxları elə düşünür ki, banklarımız devalvasiyaya görə bugünkü vəziyyətə düşüb. Ancaq, əslində, belə deyil. Vəziyyət nə vaxtsa belə nəticələnməli idi. Çünki borcalanların real maliyyə vəziyyəti haqda analiz aparılmırdı. Vətəndaşların bəzisi bu bankdan aldığı krediti ödəyə bilməyəndə, gedib o biri bankdan kredit götürüb verirdi. Banklar da ona borc üçün müraciət edənin digər banka krediti qaytarmalı olduğu ilə maraqlanmırdı. Ancaq kredit büroları olsa idi, bu baş verməzdi. Kredit büroları bank və digər borcverən təşkilatların borc almaq istəyən şəxslərin əvvəlki borclarının tarixi, ödəmə statistikası, maliyyə intizamı və borc almaq arzusunda olanların gəlirlərinin əks olunduğu məlumat bazasını təşkil edəcək. Bu isə həm bankların və ümumiyyətlə, ölkədə borcverənlərin işlərini yüngülləşdirəcək, həm də risqlərdən sığortalamağa yardım edəcək. Son nəticədə maliyyə nizam-intizamının formalaşması üçün mühüm töhfə verəcək".
Vidadi ORDAHALLI
