SOCAR-ın "Neftqaztikinti" trestinin 173 nəfər əməkdaşı işdən azad edilir. "APA-Economics" xəbər verir ki, bunu Neftçilər Hüquqlarının Müdafiəsi təşkilatının sədri Mirvari Qəhrəmanlı "Facebook" sosial şəbəkəsindəki hesabında bildirib.
Hüquq müdafiəçisi bildirib ki, işçilər müqavilə vaxtının bitməsi ilə əlaqədar tutduğu vəzifədən uzaqlaşdırılır.
"APA-Economics"in əldə etdiyi məlumata görə, trestdə "Ernst&Young" audit şirkəti tərəfindən yoxlama aparılır. "Yoxlamaların nəticələrinə əsasən trestin əməkdaşları işdən azad olunur", - deyə mənbə bildirib.
Qeyd edək ki, trestin 3000-ə yaxın əməkdaşı var.
SOCAR-ın İnsan resursları departamentinin rəisi Asif Bəkirli isə "APA-Economics"ə açıqlamasında deyib ki, yayılan məlumatlar həqiqəti əks etdirmir: "Mənə verilən məlumata görə, qeyd edilən say o qədər deyil və bu işçilər müvəqqəti layihələrdə işləyib, vaxtları bitənlərdir. Dəqiq məlumatı trestdən alıb, sizə təqdim edərik".
Asif Bəkirli bildirib ki, 2011-ci ildən hal-hazıradək "Neftqaztikinti" trestinin struktur vahidlərinə "Neft Daşları" yatağında 14 ədəd istismar quyusunun qazılması üçün 602A saylı SDÖ-nin tikintisi", "Neft Daşları" yatağında 8 ədəd istismar quyusunun qazılması üçün 620A saylı SDÖ-nin tikintisi", "Günəşli" yatağında 7 saylı DDÖ-nün tikintisi" (Təshih), "N.Nərimanov adına NQÇİ-nin "Bulla-Dəniz" yatağında 4 ədəd istismar quyusunun qazılması üçün 6 saylı SDÖ-nün tikintisi", "N.Nərimanov adına NQÇİ-nin sualtı neft-qaz və qazlift xətlərinin çəkilməsi" (12 km xətt) obyektlərinə müvəqqəti işçilər işə qəbul ediliblər.
"Hal-hazırda həmin obyektlərdə işlər başa çatdığı üçün ilin sonunadək 98 nəfər müvəqqəti layihə müddətinə işə qəbul edilmiş işçilərin əmək müqaviləsinə xitam verilməsi nəzərdə tutulub ki, həmin işçilərdən 17 nəfərinin əmək müqaviləsinə xitam verilib. Eyni zamanda, bildiyiniz kimi, SOCAR-da işə qəbul prosesi şirkət daxili Standartlar və Qaydalarla tənzimlənir ki, bunlara əsasən də müvəqqəti işçilərin daimi işə keçirilməsi yalnız müsabiqə yolu ilə aparılır. Bu baxımdan da “Neftqaztikinti” tresti tərəfindən təqdim ediləcək tədricən yaranacaq bütün vakansiyalar İnsan Resursları Departamenti tərəfindən rəsmi internet saytına veriləcək. Həmin insanlar da bu müsabiqədə iştirak edə bilərlər. Onların bir üstünlüyü də odur ki, artıq iş təcrübələri və bacarıqları vardır", - deyə A. Bəkirli bildirib.
