Vüqar Bayramov: "Bəzi hallarda vətəndaşlar bankla müqavilə bağlayarkən onun şərtlərini oxumur və ya kredit götürən şəxs müqaviləni oxusa belə, orda yazılan terminlərin nə məna daşıdığından xəbərsiz olur"
Azərbaycan banklarında standart müqavilələrin tətbiqi təklif olunur. Azərbaycan Banklar Assosiasiyasının hüquq ekspert qrupu gələn ildən bununla bağlı işlərə başlayacaq. Bu barədə Azərbaycan Banklar Assosiasiyası (ABA) hüquq ekspert qrupunun rəhbəri Qorxmaz Ağayev media nümayəndələrinə məlumat verib.
Onun sözlərinə görə, bu, istehlakçıların hüquqlarının qorunması baxımından vacibdir: "Standart müqavilələr hazırlanarkən bank təcrübəsində ortaya çıxan bütün problemlər nəzərə alınacaq. Həmçinin, bu müqavilələr tətbiq olunan zaman, vaxtaşırı bankların rast gəldiyi problemlərdən asılı olaraq, onlara dəyişiklik ediləcək".
Məsələyə münasibət bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, kommersiya banklarında standart müqavilənin tətbiqi vacibdir: "Bəzi hallarda vətəndaşlar bankla müqavilə bağlayarkən onun şərtlərini oxumur və ya kredit götürən şəxs müqaviləni oxusa belə, orda yazılan terminlərin nə məna daşıdığından xəbərsiz olur. Problem təkcə vətəndaşların kredit müqaviləsini oxumaması deyil, həmçinin, kredit müqavilələrinin dilinin, şriftinin, istifadə olunan terminlərin başa düşülməməsi ilə bağlıdır. Ona görə də birmənalı şəkildə standart müqavilələrin olmasına ehtiyac var. Belə müqavilələr tətbiq olunsa, vətəndaşlar kiçik şriftlərlə və ya anlaşılmayan terminlərlə aldadılmayacaq. Vətəndaşlar standart müqavilə əsasında öhdəliklərini daha aydın şəkildə başa düşüb ona əməl edəcək. Belə olan təqdirdə, problemli kreditlərin də həcmi azalar. Bu səbəbdən də düşünürəm ki, standart müqavilələrin tətbiqi vacibdir. Qısa zaman ərzində kommersiya bankları tərəfindən standart müqavilələrin tətbiq olunmasına ehtiyac var".
Günel CƏLİLOVA
