Ruslan Atakişiyev: "Sosial müavinətlər üzrə orta hesabla 10-20 faiz arasında artım gözlənir"
Xəbər verildiyi kimi, Azərbaycanda sosial müavinətlər və ehtiyac meyarı artırılır. Bu barədə Milli Məclisə təqdim olunmuş "Azərbaycanın 2017-ci il və gələn üç il üzrə sosial-iqtisadi inkişaf konsepsiyası" layihəsində qeyd olunub. Layihədə qeyd olunur ki, sosial müavinətlər unifikasiya ediləcək, onların məbləğinin artırılması üzrə həyata keçirilən tədbirlər davam edəcək. Həmçinin, uşaqlı ailələrə verilən müavinət sistemi təkmilləşdiriləcək.
Ölkədə müasir sosial müdafiə sisteminin qurulması və yoxsulluğun azaldılması məqsədilə ailələrin sosial yardımlara olan ehtiyacının müəyyən edilməsi qaydaları təkmilləşdiriləcək, ehtiyac meyarının minimum yaşayış standartlarına uyğunlaşdırılması üçün onun həddi mütəmadi olaraq artırılacaq.
İqtisadçı-ekspert Ruslan Atakişiyev "Bakı-Xəbər"ə açıqlamasında qeyd etdi ki, əhalinin sosial durumu nəzərə alınaraq, hər il əhalinin ehtiyac meyarı artırılır: "İstehlak səbətində olan məhsulların qiymət artımı nəzərə alınaraq sosial müavinətlərin məbləği artırılır. Sosial müavinətlərin artırılması zəruridir. Çünki son zamanlar istehlak bazarında yaşanan qiymət artımı və 2016-cı ildə inflyasiya dərəcəsinin 11 faizə çatması ehtiyac meyarının artırılmasını aktuallaşdırır".
İqtisadçının fikrincə, sosial müavinətlər üzrə orta hesabla 10-20 faiz arasında artım gözlənir. R.Atakişiyevin fikrincə, sosial müavinətlər üzrə artımın daha yüksək olması məqsədəuyğundur.
Həmsöhbətimizin sözlərinə görə, sosial müavinətlər əsasən sosial durumu ağır olan, çoxuşaqlı ailələrə şamil olunur.
Günel CƏLİLOVA
