Günel Fərhadqızı: "Əməkdaşlığın məhsuldarlığı üçün önəmli təklifdir"
Azərbaycanla Pakistanın strateji əməkdaşlığı hər iki ölkəyə böyük dividendlər gətirir. Bunu Bakıda keçirilən Azərbaycan-Pakistan biznes forumunda iqtisadiyyat naziri Şahin Mustafayev bildirib.
Nazir qeyd edib ki, Pakistanla Azərbaycan arasında siyasi əlaqələr çox yüksəkdir: "İndiyədək ölkələrimiz arasında 36 sənəd imzalanıb. Bunun 12-si iqtisadi sahədədir. 2016-cı ilin yanvar-oktyabr aylarında ölkələrimiz arasında ticarət dövriyyəsi 3,6 dəfə artıb. Azərbaycanda 127 Pakistan sərmayəli şirkət fəaliyyət göstərir. Eyni zamanda, ölkələrimiz arasında humanitar sahədə də sıx əməkdaşlıq mövcuddur. Biz ölkələr arasında iqtisadi əlaqələri də inkişaf etdirmək fikrindəyik. İlk öncə Pakistanla ticarət əlaqələrini genişləndirməyi nəzərdə tutmuşuq. Eyni zamanda, iki ölkə arasında investisiyaların qarşılıqlı artırılması ilə bağlı danışıqlar aparacağıq. İki ölkə arasında sənaye sahəsində akkumlyator, əczaçılıq sahəsində dərman istehsalı ilə bağlı birgə layihələrin həyata keçirilməsi ilə bağlı müzakirələr aparacağıq. Bununla belə, Pakistanın Azərbaycanın tranzit yollarından istifadə etməsi üçün böyük imkanlar var. Turizm sahəsini qarşılıqlı olaraq inkişaf etdirmək üçün pakistanlı iş adamları burada sahibkarlar üçün yaradılan şəraitdən istifadə edə bilər. Gələn il yanvarın sonunda Azərbaycanın ixrac missiyası Pakistana yola düşəcək".
Pakistanın ticarət naziri Xurram Dastgir Xan vurğulayıb ki, Pakistan Azərbaycanla ticarət, sənaye, əczaçılıq, toxuculuq sənayesi, energetika, kənd təsərrüfatı, dəri istehsalı və emalı sahəsində əməkdaşlıq edə bilər: "Pakistan Azərbaycanın inkişafını öz yüksəlişi kimi qiymətləndirir. Bir çox sahələrdə əməkdaşlığı genişləndirmək niyyətindəyik. Bu cür biznes görüşlərinin təşkili həm hər iki ölkənin iş adamları arasında, həm də dövlət səviyyəsində iqtisadi münasibətlərin inkişafını daha da sürətləndirəcək. Azərbaycanla Pakistan arasında hazırkı ticarət dövriyyəsi siyasi əlaqələrdən qat-qat aşağıdır. Pakistan Azərbaycana 5 illik iqtisadi əməkdaşlıq planı təqdim edib. Ümid edirik ki, bu əməkdaşlıq layihəsi Azərbaycan tərəfindən nəzərdən keçirildikdən sonra imzalanacaq. İki ölkə arasında ticari imtiyazlar, hansı sahələrdə əməkdaşlıq inkişafa səbəb ola bilər, hansı sahələrə sərmayə qoymaq daha sərfəlidir, bütün bunlar sözügedən layihədə əksini tapıb. İki ölkə arasında "Azad ticarət" sazişinin bağlanması da mütləqdir. Kimya, tekstil, tikinti, mədən sənayesi, polad istehsalı, logistika, tibb, quşçuluq sahəsində də əməkdaşlıq üçün şərait var".
5 illik əməkdaşlıq planı təsdiqini taparsa, bunun ölkələr üçün nə kimi əhəməyyəti olar?
İqtisadçı Günel Fərhadqızı qəzetimizə açıqlamasında bildirdi ki, Azərbaycanın Pakistanla gözəl ticarət münasibətləri qurmağa tam əsası və şəraiti var: "Pakistan Azərbaycanla çox səmimiyyətlə dostluq edir. Yeganə ölkədir ki, Dağlıq Qarabağ münaqişəsinə görə Ermənistanla heç bir diplomatik münasibət qurmayıb. Pakistanla bizim siyasi sahədə olduğu kimi, iqtisadi əməkdaşlığımız da böyük fayda verə bilər. Nazirlərin görüşündə qarşlıqlı fayda verə biləcək məsələlər ətrafında fikir mübadiləsi aparılıb. Əminliklə demək olar ki, bu sahədə razılıq əldə olunacaq. Pakistan eyni zamanda böyük əraziyə və təbii ehtiyatlara malik olan ölkədir. Azərbaycanın da iqtisadiyyatında onların yararlanmaq istədiyi sahələr var. Onlar tərəfindən 5 illik əməkdaşlıq planının təqdim olunması çox faydalıdır. Çünki həmin planda konkret sahələr üzrə detallar qeyd olunacaq ki, hər iki ölkə ona əməl etməlidir. Əməkdaşlığın məhsuldarlığı üçün önəmli təklifdir. Pakistanlı nazirin təklif etdiyi sahələr üzrə əməkdaşlıq Azərbaycan üçün də böyük əhəmiyyət daşıyır. Çünki bizim hazırda qeyri-neft sektorunun inkişafına böyük ehtiyacımız var".
Məhəmmədəli QƏRİBLİ
