İldırım Qurbanov: "Aztəminatlı ailələrin təminat məsələsi bazara uyğun qurulmalıdır"
"Ölkədə qazın və işığın qiymətlərinin differensiallaşdırılmasından sonra, Prezident İlham Əliyevin tapşırığına uyğun olaraq, 2017-ci ilin dövlət büdcəsində nəzərdə tutulan gəlir və xərclər artırılaraq əhalinin aztəminatlı hissəsinin sosial təminatına yönəldiləcək".
Xəbər verildiyi kimi, bunu maliyyə naziri Samir Şərifov deyib. Nazir bildirib ki, qaz və işığın qiymətləri artdığına görə gələn il ünvanlı sosial yardımlar da artırılacaq: "Qaz və işığın qiymətinin differensiallaşdırılması ilə əlaqədar əhalinin həssas qrupları üçün nəzərdə tutulmuş ünvanlı sosial yardımların miqdarının artırılması nəzərdə tutulur".
Əmək və əhalinin sosial müdafiəsi naziri Səlim Müslümov isə bildirib ki, iqtisadi sferada baş verən dəyişikliklər sosial sferada da öz təsirini göstərir. Onun fikrincə, müvafiq qərar qəbul olunmazdan öncə bu qərarın aztəminatlı ailələrə minimum təsir göstərməsi ilə bağlı daxili müzakirələr aparılıb: "Tarif Şurası buna çox gözəl reaksiya verdi və minimum istehlak səbətinə uyğun olaraq istehlak həcmində tariflərin artırılmaması ilə bağlı qərar qəbul etdi. Əlbəttə, tariflərin artırılması aztəminatlı təbəqəyə öz təsirini göstərə bilər. Hazırda Milli Məclisdə bu məsələ müzakirə olunur. Təkcə bu tədbir nəticəsində ünvanlı sosial yardım alan ailələrin sayı 18 minə yaxın artacaq. Eləcə də hər bir ailənin aldığı vəsaitin həcmi artacaq. Məsələn, 4 nəfərlik ailədə bu artım 44 manat olacaq. Tariflərin artmasından ailələrin çəkə biləcəyi zərəri bu yolla kompensasiya etməyə çalışacağıq".
Maraqlıdır, bəs ekspertlər bu məsələyə necə yanaşır? Gələn il ünvanlı sosial yardımın nə qədər artırılması məqsədəmüvafiq olar? Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert İldırım Qurbanovun fikrincə, ünvanlı sosial yardımın minimum 30 faiz artırılmasına zərurət var: "Məsələ ondadır ki, devalvasiyadan sonra bir sıra məhsulların qiyməti artıb. Elə məhsullar var ki, qiyməti 60-70 faiz artıb. Bir sıra gündəlik tələbat malları var ki, onların qiymətində 30-40 faiz artım var. Ona görə də aztəminatlı ailələrin təminat məsələsi bazara uyğun qurulmalıdır. Elə etmək lazımdır ki, aztəminatlı ailələr alacağı ünvanlı sosial yardım hesabına öz minimal tələbatını ödəyə bilsin. Hər halda, bazarda tələb və təklif qanunu olduğu üçün onu nəzərə almaq lazımdır. Yəni təklif artdıqca, tələb də ona uyğunlaşmalıdır. Bəzən elə olur ki, tələb artır, amma təklif azalır. Bu da müəyyən sosial gərginliyə səbəb olur. Hesab edirəm ki, ünvanlı sosial yardımın məbləği minimum 30-40 faiz artırılsa, daha yaxşı olar. Ən yaxşı halda 50 faiz artım olmalıdır. Çünki orta hesabla götürəndə bazarda elə məhsullar var ki, qiyməti 50 faiz artıb. O üzdən düşünürəm ki, artımlar bazara uyğun olmalıdır".
Vidadi ORDAHALLI
