Fikrət Yusifov: "Əmək pensiyalarının sığorta hissəsinin indeksləşdirilməsi üçün nəzərdə tutulan vəsaitin həcmi isə mövcud iqtisadi vəziyyətdə reallığa uyğun müəyyən edilib"
Gələn il əmək pensiyalarının sığorta hissəsinin indeksləşdirilməsinə sərf olunacaq vəsaitin həcmi məlum olub.
Milli Məclisin Əmək və sosial siyasət, Səhiyyə, Ailə, qadın və uşaq məsələləri, Elm və təhsil, Mədəniyyət komitələrinin birgə iclasında 2017-ci il üzrə dövlət büdcəsi layihəsinin müzakirəsi zamanı çıxış edən əmək və əhalinin sosial müdafiəsi naziri Səlim Müslümov deyib ki, "Dövlət Sosial Müdafiə Fondunun 2017-ci il büdcəsi"ndə proqnozların tərtibi zamanı gələn il əmək pensiyalarının sığorta hissəsinin 2016-cı ilin yekunlarına görə indeksləşdirilməsi nəzərə alınıb. Nazir əlavə edib ki, gələn il əmək pensiyalarının sığorta hissəsinin indeksləşdirilməsinə 127 mln. manatın sərf olunacağı nəzərdə tutulur.
Gələn il üçün əmək pensiyalarının indekləşdirilməsi məqsədilə ayrılan vəsaitlə bağlı fikir bildirən iqtisadçı-ekspert Fikrət Yusifov "Bakı-Xəbər"ə açıqlamasında qeyd etdi ki, 2017-ci ilin büdcəsi tam sosialyönlü bir büdcədir: "Büdcədə əksər xərclərin azaldılması nəzərdə tutulsa da, onun ümumi xərcləri cari ilin büdcə layihəsi ilə nəzərdə tutulan xərclərə nisbətən 1,9 milyard manat azaldılsa da, büdcədə sosial xərclərin artımı proqnozlaşdırılır. Belə ki, layihədə sosialyönümlü xərclərin ümumi çəkisi 40,3 faiz səviyyəsində müəyyən edilib. Bu xərclər cari illə müqayisədə 292 milyon manat artırılaraq 6 milyard 686 milyon manat nəzərdə tutulub. 2017-ci ildə sosial müdafiə və sosial təminat xərclərinə dövlət büdcəsi xərclərinin 12,4 faizi və ya 2 milyard 53 milyon manat ayrılması nəzərdə tutulub. Əmək pensiyalarının sığorta hissəsinin indeksləşdirilməsi üçün nəzərdə tutulan vəsaitin həcmi isə mövcud iqtisadi vəziyyətdə reallığa uyğun müəyyən edilib. Təbii ki, növbəti ildə maliyyə imkanları proqnozlaşdırılandan daha yaxşı olarsa, o halda bu sahəyə daha çox vəsaitin ayrılması məsələsi gündəmə gələ bilər. Cari ilin fevral ayında da büdcədən maliyyələşən təşkilatlarda çalışan işçilərin əməkhaqlarının və təqaüdlərin 10 faiz artımına dair qərar qəbul edildi. Gələn il maliyyə sabitliyi əldə olunarsa, ilin ikinci yarısında bu məsələlərə yenidən baxmaq olar".
Günel CƏLİLOVA
