Natiq Cəfərli: "Gələcəkdə bankların normal fəaliyyəti bərpa olunduqdan sonra banklararası bazarın yaradılmasına ehtiyac yarana bilər"
"Biz banklararası bazar formalaşdırmalıyıq, hansı ki, bu gün Azərbaycanda çox da aktiv deyil". Bunu Bakıda keçirilən Azərbaycan-ABŞ biznes forumunda Mərkəzi Bankın (AMB) şöbə rəisi Leyla Yusifzadə deyib.
Banklararası bazarın formalaşdırılması təklifinə münasibət bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, buna ehtiyac var. Bankların özünün iştirak etdiyi bazar formalaşdırılmalıdır: "Söhbət kredit və qiymətli kağız bazarından gedir. Belə bir bazarın yaradılması bank sektorunun inkişafı baxımından vacibdir. Həm də digər investorlar və holdinqlər bazardan istifadə etməklə müxtəlif resurslara, o cümlədən, maliyyə sahəsinə çıxış imkanı əldə etməlidir. Bu səbəbdən də düşünürəm ki, belə bir bazarın yaradılması aktualdır".
İqtisadçının fikrincə, banklararası bazarın yaradılması imkan verəcək ki, bankların aktivliyi artsın, banklar daha fəal şəkildə proseslərə müdaxilə edə bilsin: "Banklararası bazarın yaradılmasının əhəmiyyətindən biri də odur ki, adıçəkilən bazar kreditləşmədə və digər sektorda prosesləri tənzimləyə bilər. Banklararası bazar yaradılarsa, banklar bazara daha fərqli məhsullar təklif edə bilər".
Ekspert Natiq Cəfərli bizimlə söhbətində qeyd etdi ki, belə bir təklif illər öncə səsləndirilib: "Bəllidir ki, hazırda bank sisteminin ciddi problemləri var. Ciddi problemlərin həlli yeni bir qurumun yaradılmasından asılı deyil. Bankların sağlamlaşdırılmasına və onların mənfi aktivlərdən qurtulmasına ehtiyac var. Bank sektorunda yaşanan problemlər həll olunmalıdır ki, sağlamlaşdırma keçirilsin. İlkin olaraq bank sisteminin sağlamlaşdırma proses başa çatmalıdır ki, hər hansı bir qurumların yaradılmasına ehtiyac olsun. Zənnimcə, hazırkı şəraitdə belə bir bazarın yaradılması bank sektoruna ciddi təsir etməyəcək. Gələcəkdə bankların normal fəaliyyəti bərpa olunduqdan sonra belə bir qurumun yaradılmasına ehtiyac yarana bilər".
Günel CƏLİLOVA
